.png)
Ligji për pagat nuk parashikohet të votohet nga Parlamenti përpara zgjedhjeve lokale të 14 majit. Këtë la të nënkuptojë kryeministri Edi Rama gjatë takimit elektoral të zhvilluar pasditen e së enjtes në Kukës.
Fajin për mos miratimin e ligjit për rritjen e pagave Rama ia hodhi deputetëve Kuvendit. Kryesocialisti reagoi dhe ndaj akuzave të opozitës që i ka shtyrë Edi Rama rritjen e pagave. “Pagat e mjekëve, mësuesve, punonjësve të sigurisë janë rritur edhe i marrin tani në maj. E dyta unë kam pasur një debat se për të gjithë të tjerët ligji për pagat e tjera duhet të miratohet në Parlament. Qeverisë dhe deputetëve duhet tu rriten pagat të fundit fare, domethënë vitin vjetër, kur të mbarojë rritja për të gjithë. Deputetët duan me i rrit tani, dhe është bllokuar për disa javë kjo punë, sepse duhet të më bindin mua, ose pastaj nuk e di se çfarë do të ndodhë”, theksoi Rama.
Ndërkohë ai garantoi se pavarësisht se kur do të bëhet votimi, efekti i rritjes së pagës do të nisë që nga prilli.
“Ama një gjë është e sigurt, se edhe në se rritja e pagave bëhet në qershor, të gjitha pagat do t’i marrin me gjithë prillin dhe majin së bashku. Këtë po e them këtu merreni e regjistrojeni këtë dhe kështu që asnjëri s’duhet të ketë shqetësim. Kështu që halli është deputetët duan të marrin rritjen e pagave tani, unë them jo! Ky është i vetmi problem, por këtë punë e di Pandi (Majko) që është në krahun e deputetëve”, theksoi Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
