Alkaraz dominon Medvedev dhe rikthehet numri 1. Triumfon edhe Ribakina

11:30 - 20 Mars 2023

Gazeta Si – Karlos Alkaraz dhe Elena Ribakina janë kampionët e rinj të Indian Wells. Fenomeni spanjoll, pas suksesit ndaj Danil Medvedev në finale, i rrëmben fronin Novak Gjokoviçit në renditjen botërore.

Karlos Alkaraz, pa mbushur 20 vjeç, fiton turneun e 3-të Masters 1000 në karrierë dhe rikthehet numri 1 në botë. Ai mundi rusin Danil Medvedev në finalen e Indian Wells. Iberiku ishte i papërmbajtshëm dhe e mbylli ndeshjen 6-3 dhe 6-2, për një orë e 10 minuta.

👑 THE KING IN CALI 👑

🇪🇸 @carlosalcaraz defeats Medvedev 6-3, 6-2 to capture his first Indian Wells title and reclaim the World No. 1 ranking! @BNPPARIBASOPEN | #TennisParadise pic.twitter.com/H2mhr9JhB0
— ATP Tour (@atptour) March 20, 2023

Ndalet ecuria e mirë prej 19 fitoresh radhazi për Medvedev. Rusi nuk mundi të bënte ‘poker’, pas sukseseve në Dubai, Doha dhe Roterdam. E kishte shumë të vështirë ndaj një Alkarazi në formë shumë të mirë, me vetëm një humbje në 2023-shin, atë ndaj Norri në finalen e Rio de Zhaneiros.

Vërtet një fenomen adoleshenti nga Mursia, i cili i ka lënë të gjithë gojëhapur me nivelin që tregoi në turneun amerikan. Spanjolli ka një varietet goditjesh të pabesueshme. Paradoksalisht për këtë arsye ndonjëherë rrezikon shumë dhe gabon, por kur ai ‘ndizet’, askush nuk mund ta përballojë.

NUMERO UNO 🇪🇸🏆

The moment @carlosalcaraz won his third ATP Masters 1000 title without dropping a set! @BNPPARIBASOPEN | #TennisParadise pic.twitter.com/BjqnLHVf2I
— ATP Tour (@atptour) March 20, 2023

Finalja e femrave është fituar nga Elena Ribakina, e cila është ‘hakmarrë’ pas 7 javësh në finale ndaj Arina Sabalenkës. Ribakina ia doli të fitonte një finale të fortë dhe spektakolare me rezultatin 7-5 dhe 6-4. Ndeshja përfundoi pas 2 orë e 3 minutash.

Tenistja kazake, tashmë numri 7 në botë, ka triumfuar për herë të parë në karrierë ndaj bjelloruses, që mban vendin e 2-të në renditjen botërore. Në sfidën e fundit mes tyre në janar, Sabalenka fitoi trofeun e Australian Open.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.