Gazeta Si – Pas gjashtë vitesh në arrati, një 51-vjeçar nga Mati është arrestuar këtë të martë, pasi ishte dënuar me 8 vjet burg për kultivim të lëndëve narkotike.
Lika, banues në Rukaj, Mat, ishte i shpallur në kërkim që në vitin 2016. Gjatë operacionit të policisë në fshatin Rremull i Njësisë Administrative Rukaj, u gjetën 4020 bimë kanabis sativa të kultivuara në katër parcela.
Ndërsa në një përrua afër banesës së tij, u konstatua një hangar i ndërtuar me shtylla druri brenda të cilit kishte të varura një sasi degësh të bimës kanabis për t’u tharë.
Gjithashtu, 100 metra më lart, tek një banesë e pabanuar që administrohej nga 51-vjeçari u gjet një sasi tjetër degësh kanabis që ishin vendosur për t’u tharë, me peshë totale 3052 kg.
Kështu nga hetimet rezultoi se Lika ishte autori i kultivimit dhe i prodhimit të kanabisit të gjetur dhe të sekuestruar gjatë operacionit.
Pas arrestimit, Shpëtim Lika pritet të vuajë dënimin e dhënë nga Gjykata e Posaçme e Shkallës së Parë për Korrupsionin dhe Krimin e Organizuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
