.png)
Gazeta Si – “Skualifikimi ynë nga Uimbëlldoni nuk ka ndryshuar asgjë, lufta vazhdon”. Tenistja bjelloruse, numri 5 në botë, Arina Sabalenka, është një nga yjet që nuk mundi të luante në barin e Londrës vitin e kaluar. Organizatorët vendosën të përjashtonin sportistët rusë dhe bjellorusë pas pushtimit rus të Ukrainës.
Tani Sabalenka e kritikon edhe më ashpër këtë vendim: “Jam shumë e zhgënjyer që sporti bëhet në një farë mënyre pjesë e politikës, – tha ajo për të përditshmen australiane ‘The Age’. – Jemi vetëm sportistë. Kaq. Nuk merremi me politikë. Nëse të gjithë ne do mund të bënim diçka për ta ndalur luftën, do ta bëjmë, por nuk kemi asgjë në dorë”.
Sabalenka ishte një nga lojtaret më të mira që nuk mundi të merrte pjesë në Uimbëlldon. Një zgjedhje që ‘All England Lawn tennis Club’ e pagoi me një gjobë, ndërkohë që u fshinë pikët në klasifikim nga ana e ATP-së dhe WTA-së.
Nuk është bërë ende e ditur, nëse vendimi është në fuqi edhe për edicionin e radhës. Sabalenka shpreson shumë që të luajë në turneun Slam në bar. “Askush nuk e mbështet luftën. Ka qenë një periudhë e vështirë për të gjithë. Na vjen keq, sepse atmosfera në Uimbëlldon është fantastike. Shpresoj shumë të luaj këtë vit”, – përfundoi tenistja bjelloruse.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
