.png)
Gazeta Si - Tre makina dhe një dyqan me mallra industriale janë djegur gjatë natës në Vlorë në dy incidente të ndryshme, ku zjarrvëniet kanë qenë të qëllimshme.
Ngjarja e parë ka ndodhur në lagjen “24 Maji” rreth orës 02:00. Makinat kanë qenë të parkuara dhe janë në pronësi të biznesmenit me iniciale Z.K.
Nga filmimet e kamerave të sigurisë, dallohen qartë dy persona që shkojnë në drejtim të mjeteve gjatë natës dhe i vendosin flakën.
Mësohet se nga flakët janë përfshirë dy furgonë dhe një autoveturë, ndërsa bizesmeni dyshon për zjarrvënie për shkak të konkurencës.
Në ngjarjen e dytë, policia ka shpallur një person në kërkim, pasi i vuri zjarrin një dyqani dhe tentoi të digjte një makinë në pronësi të të njëjtit pronar.
Specialistët për Hetimin e Krimeve në Komisariatin e Policisë Vlorë, pas veprime të shpejta hetimore, bënë të mundur identifikimin dhe shpalljen në kërkim për veprën penale “Shkatërrimi i pronës me zjarr”, të shtetasit Q. M., 39 vjeç, banues në lagjen “Hajro Çakërri”, Vlorë”, njoftoi policia.
39-vjeçari, në orët e para të mëngjesit, dyshohet se në lagjen “Hajro Çakërri”, i ka vënë zjarrin një dyqani shumice me mallra industrialë, në pronësi të F. V., 65 vjeç.
Për shkak të flakëve janë shkaktuar vetëm dëme materiale. Gjithashtu, në lagjen “Uji i Ftohtë”, në afërsi të banesës 65-vjeçarit, i riu ka tentuar të djegë edhe automjeti e markës “Toyota”, po në pronësi të këtij shtetasi.
Deri më tani policia nuk bën me dije arsyet se pse i riu ka dashur të djegë dyqanin dhe makinën e 65-vjeçarit. Uniformat blu thonë se po vijojnë hetimet dhe po punohet për kapjen e autorit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
