.png)
Gazeta Si - Reshjet e dendura të shiut që kanë rënë gjatë gjithë natës, kanë vazhduar edhe në orët e para të kësaj të diele, duke kanë shkaktuar dëme në disa zona të vendit.
Sipas asaj që njofton Qendra Kombëtare Operacionale e Emergjencave Civile në Agjencinë e Mbrojtjes Civile, në njësinë administrative Ana Malit, ka përmbytje në një sipërfaqe prej 400 ha.
Po ashtu, bëhet e ditur se ka ndërprerje të energjisë elektrike në njësinë administrative Ana Malit, fshatrat Beltojë, Mali Hebe njësia administrative Bërdicë, si dhe njësia administrative Shkrel në Malësinë e Madhe.
Në njësinë administrative Zejmen në Lezhë ka sipërfaqe toke të përmbytur, 50 ha në fushën e Treshit dhe 15 ha në Spiten, ndërsa në njësinë administrative Balldren, ish-këneta e Torovicës ka 200 ha tokë nën ujë.
Në Mirditë ka rritje të prurjeve të përroit të Zmejës, në afërsi të qytetit Rrëshen, i cili është në kuotë kritike.
Njoftohet gjithashtu se është hapur diga në rezervuarin e Qafëmollës në Rrëshen pasi ka arritur pikën kritike, nuk ka shkaktuar probleme deri tani.
Në Kurbin ka prezencë uji në lagjen Sanxhak, qyteti Laç në 15 banesa. Kurse, në lagjen “Granicë” të qytetit të Gjirokastrës përroi i “Çullos” ka shtuar prurjet dhe rrezikon banesat, ndërkohë që është bllokuar lagjja Lenxat në fshatin Lazarat.
Në aksin rrugor Kardhiq-Delvinë, 200 metra pranë tunelit të Skërficës kanë vërshuar ujërat e një përroi malor.
Midis fshatrave Bënçë dhe Lekdush, një masiv me dhera ka bllokuar rrugën po punohet për largimin e inerteve. Në Shijak lumi Erzen në pjesën e fshatit Hardhishtë, njësia administrative Gjepalaj, ka dalë nga shtrati.
Në Krujë, lumi Ishëm në pjesën e fshatit Marqinë, njësia administrative Bubq, ka dalë nga shtrati.
Në Fier ka ndërprerje të energjisë në disa fshatra, ndërkohë që ka tendencë rritjeje të nivelit të lumenjeve Vjosë, Seman dhe Shkumbin.
Në Elbasan ka rënie inertesh ne aksin Elbasan-Qafe Thane, Elbasan-Gjinar, Gramsh-Moglice, po punohet nga firmat kontraktore.
Në aksin e Rrugës së Arbërit sipër tuneleve në hyrje të Baypassit në drejtim të Qafë Murrizës, ka rrëshqitje të dherave nga skarpatet në një segment rruge, po punohet për largimin e inerteve.
Në aksin rrugor nacional Burrel – Shkopet në Shkopet ka rënie gurësh në rrugë në 2 segmente, kalimi bëhet në një sens.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
