Gazeta Si – Pak orë pas vrasjes me armë zjarri të Pjetër Kolës mbrëmjen e 27 shtatorit 2022 në Pukë, policia ka shpallur në kërkim Martin Anton Gjinin si autor të dyshuar.
44 vjeçari Kola u paraqit fillimisht i plagosur në qendrën shëndetësore Vau i Dejës, ndërsa u transportua për ndihmë mjekësore më të specializuar në spitalin e Shkodrës, ku dhe ndërroi jetë.
Dyshohet se ai u qëllua me armë zjarri teksa ishte duke lëvizur me makinë drejt të Pukës.
Burime paraprake, bëjnë të ditur se viktima ka qenë bashkë me vëllanë e tij kur është qëlluar. Ka qenë pikërisht vëllai i 44-vjeçarit që ka njoftuar policinë dhe ambulancën.
Për shkak se ngjarja ka ndodhur në një zonë rurale, pranë fshatit Qafë Çelë, Pukë, e vështirëson kapjen e autorit, teksa dyshimet janë se ai mund të jetë larguar drejt Kosovës.
Ndërkohë, si autori dhe viktima nuk rezultojnë me precedent të mëparshëm penalë dhe as nuk dihet burimi i konfliktit të tyre, ndërsa dy familjet e tyre banojnë në Lezhë.
Prokuroria po heton për pistat e mundshme të kësaj ngjarjeje, por dyshimet janë për një konflikt mes viktimës dhe autorit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
