.png)
Gazeta Si- Biznesmeni i ndërtimit nga Shqipëria, Xhani Topalli, i cili ishte zhdukur prej 10 ditësh në Rodos të Greqisë, është vrarë.
Autori, një 53-vjeçar identiteti i të cilit nuk bëhet i ditur, ka pranuar krimin e rëndë dhe u ka treguar autoriteteve greke se ku e kishte lënë trupin e 46-vjeçarit.
Sipas asaj që shkruajnë mediat, 53-vjeçari e ka mbytur shqiptarin me litar. Në pranga ka përfunduar edhe djali i autorit të krimit, pasi dyshohet se kanë bashkëpunuar për fshehjen e trupit.
Topalli, baba i tre fëmijëve të mitur, ishte shpallur i zhdukur që prej 28 gushtit. Autoritetet u vunë në kërkim të tij dhe u zbulua se ai kishte lënë një takim me 53-vjeçarin.
Ky i fundit i kishte borxhe biznesmenit shqiptar. Autoritetet mundën që t’i zbulonin të gjitha falë edhe dëshmisë së autorit.
Mësohet se ndaj shqiptarit kishin borxhe disa biznesmenë të ndryshëm, ndër ta edhe 53-vjeçari, pronar i një hoteli në Kallithea.
Të dielën ai kishte lënë takim me hotelierin me të cilin kishin rënë dakord në prezencë të një avokati për pagesën e 30 mijë euro borxhe nga një projekt tjetër.
53-vjeçari, në dëshminë e parë ka thënë se takimi mes tyre ishte anuluar. Megjithatë, pas hetimeve dhe këqyrjes së kamerave të sigurisë u zbulua e kundërta.
Autori i dyshuar supozohej që të dëshmonte të shtunën, por nuk u paraqit me justifikimin se ishte sëmurë një i afërm. Por nga policia u zbulua se nuk ishte shtruar në spital dhe për këtë arsye 53-vjeçari u mor për të sqaruar ngjarjen.
Në një video të transmetuar nga Mega Tv, është regjistruar rruga e 46-vjeçarit drejt pikës së takimit.
Makina e tij është parë duke kaluar në Faliraki. Ky është dhe vendi i fundit ku janë regjistruar gjurmët e tij para se të zhdukej.
Ky është rasti i dytë që brenda pak ditësh një biznesmen shqiptar humb vritet jashtë vendit. Të dielën u gjet i vdekur me armë zjarri 43-vjeçari Fatmir Ara në Itali, i cili dyshohet të jetë ekzekutuar nga grupet kriminale për prishje të pazareve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
