Gazeta Si – Një vajzë 25-vjeçare rrezikoi të mbytej në një pishinë pranë një resorti në Linzë të Tiranës një ditë më parë.
Pamjet e kamerave tregojnë se shoqëruesi i saj dhe vetë e reja po luanin në ujë në momentin kur ndodhi ngjarja.
Stafi i lokalit i pyetur në polici ka shpjeguar se pishina ka qenë e mbyllur për shkak të orarit dhe motit me shi dhe se dy të rinjve iu ishte bërë i ditur ky fakt.
Ndërkohë, administratori i pishinës në Linzë, ku rrezikoi të mbytej 25-vjeçarja është shpallur në kërkim.
Policia thotë se 52-vjeçari Y.H., akuzohet për veprën penale ‘shkelja e rregullave të mbrojtjes në punë’, pasi nuk kishte caktuar përgjegjës për pishinën, siç e parashikon ligji.
Ndërkohë, 25-vjeçarja E.T., vijon të jetë në repartin e reanimacionit në gjendje të rëndë në Spitalin e Traumës.
Ajo ishte duke u larë në pishinë bashkë me shokun e saj dhe paraprakisht mësohet se asnjë prej dy të rinjve nuk dinte not.
Të pyetur nga policia, anëtarët e stafit u kanë thënë hetuesve se pishina ishte mbyllur për shkak të orarit dhe kushteve të motit që u shoqërua me reshje shiu në Tiranë pasditen e të hënës.
Më pas videot kanë regjistruar momentin kur vajza mbetet në ujë dhe shoqëruesi i saj del në breg dhe fillon të thërrasë duke goditur bordurën.
Pas këtyre thirrjeve anëtarët e stafit kanë shkuar duke u hedhur në ujë ku kanë bërë nxjerrjen e trupit të 25-vjeçares e cila u dërgua për ndihmë mjekësore në spital.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
