Gazeta Si – Një 60-vjeçar është qëlluar me armë zjarri në anë të rrugës në autostradën Laç-Lezhë. Ngjarja ka ndodhur rreth mesnatës në orën 00:25.
Sipas policisë, i plagosur ka mbetur Besim Zeneli 60 vjeç nga fshati Shullaz i Kurbinit.
Ngjarja ka ndodhur pranë dyqanit të fruta-perimeve, ku Besim Zeneli punonte në autostradë.
Burime nga grupi hetimor bëjnë me dije se ka qenë një person i cili ka qëlluar drejt Zenelit.
Ai ka qenë i maskuar teksa është afruar pranë dyqanit ku po punonte Zeneli dhe e ka qëlluar me një plumb në bark.
Besim Zeneli është dërguar në Spitalin e Traumës në Tiranë për të marrë ndihmë mjekësore.
Policia ka shoqëruar 3 persona, mes tyre dhe autorin e dyshuar të ngjarjes dhe po kryejnë veprimet hetimore për dokumentimin e plotë ligjor të ngjarjes dhe arrestimin e autorëve të dyshuar.
Zeneli është munduar të vetëmbrohet dhe e ka qëlluar me një kavanoz, ku më pas autori i dyshuar është larguar në këmbë në një parcelë/are pas biznesit.
Janë dy pista që po hetohen: E para dyshohet se ishte grabitje, pasi autori ka qenë i maskuar dhe në këmbë.
E dyta është hakmarrja, por si pistë më e zbehtë, pasi familja e tij nuk ka konflikt, përjashtuar ato të shumë kohëve më parë.
Grupi hetimor vijon veprimet në vendin e ngjarjes, duke administruar çdo provë dhe vlerësuar çdo informacion, për zbardhjen e plotë të rrethanave të ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
