Gazeta Si – Motra e të penduarit të drejtësisë, Nuredin Dumanit, ka dhënë dorëheqjen nga dikasteri i Ministrisë së Jashtme.
Në një letër të publikuar për mediat, Xhuljana Dumani thotë se ndihet e rrezikuar për jetën.
“Jam baltosur në mënyrë të padrejtë e po vijoj të baltosem e të rrezikohem çdo orë e më shumë për shkak të publikimit të të dhënave të mia personale, fotografive, vendit të punës”, – shkruan në letrën e dorëheqjes.
Nga ana tjetër, motra e Dumanit shprehet se institucioni ku ajo punon prej disa kohësh po akuzohet padrejtësisht.
Ajo pretendon se detyra e saj ka qenë tërësisht teknike dhe pa akses në dokumentacionin të klasifikuar.
Dorëheqja vjen pak orë pasi Ministria e Jashtme reagoi me një sqarim pas raportimeve se motra e Dumanit, ishte punësuar në këtë dikaster dhe ishte pajisur me certifikatë sigurie.
Në një njoftim për mediat, MEPJ sqaroi se shtetasja me iniciale Xh.D. ishte përzgjedhur fillimisht për të kryer praktikën 3-mujore në ministri.
Pas përfundimit të praktikës, me motrën e Nuredin Dumanit është lidhur një kontratë 1-vjeçare pune.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
