.png)
Lia e majmunëve është një tjetër virus që ka shqetësuar autoritetet shëndetësore në botë.
Ekspertët vendas e shohin këtë sëmundje me rrisk të ulët për Shqipërinë.
Epidemiologu Ilir Alimehmeti i tha Gazetasi.al se ka një vaksinë për linë e majmunëve e quajtur MVA-BN. Kjo vaksinë është miratuar vetëm nga FDA, më 24 shtator të vitit 2019.
“Duke qenë se rastet janë aq pak sa ç‘janë nuk kemi si t’i marrim për numra kaq të vegjël. Nuk duhet të merret paraprakisht vaksina sepse rrezikshmëria është pothuajse zero”, shpjegon Alimehmeti.
Në kuadër të masave të marra, Ministrja e Shëndetësisë Ogerta Manastirliu, tha të hënën pas një mbledhje në ISHP se, po bëhen përgatitjet për diagnostikimin e lisë së majmunit në laboratorin e ISHP.
“Jemi duke bashkëpunuar me laboratorët e referencës në Londër dhe në Hollandë, për të pasur mundësinë që mostrat të cilat mund të jenë të dyshuara, të mundet të referohen menjëherë”, bëri me dije Manastirliu.
LEXO EDHE:
- Epidemiologët i bëjnë thirrje OBSH-së dhe qeverive të veprojnë kundrejt lisë së majmunëve
- ISHP këshillon vaksinim për linë e majmunit për personelin mjekësor dhe kontaktet e afërta
Më tej mjeku shpjegon se ka 377 raste të identifikuara dhe asnjë humbje jete në të gjithë botën, kështu rreziku nuk diskutohet.
“Diskutimi ishte për vaksinimin e kontakteve të një rasti të njohur. Por numrat e infektimeve janë shumë të vegjël. Nuk janë numra që detyrojnë shtetet të marrin sasi të mëdha vaksine”, shpjegon Alimehmeti.
Duke folur për rëndesën e sëmundjes eksperti shpjegon se nga analiza e rasteve është përcaktuar se janë të gjitha të lehta. Alimehmeti shpjegon që kalohet lehtë si sëmundje.
Gjatë fjalës së saj në ISHP, Manastirliu tha të hënën se Shqipëria ka një survejancë të shtuar aktive.
“Janë kryer të gjithë trajnimet e nevojshme në personelin mjekësor në kujdesin parësor. Në Njësitë Vendore të Kujdesit Shëndetësor, për të mundësuar evidentimin në kohë të rasteve të mundshme”, tha Manastirliu.
Nga ana tjetër ekspertë të shëndetit publik në botë, i kanë bërë thirrje Organizatës Botërore të Shëndetësisë, që të japin udhëzime të qarta për këtë sëmundje.
Ata po argumentojnë se qeveritë dhe OBSH, nuk duhet të përsërisin gabimet e pandemisë COVID-19.
Ndërsa OBSH ka deklaruar se po shqyrton, nëse shpërthimi duhet të vlerësohet si një emergjencë e mundshme e shëndetit publik.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
