Gazeta Si – Një 27 vjeçar nga Tirana është arrestuar, pasi në makinë po transportonte 33 emigrantë të paligjshëm.
I riu lokalizua në dalje të Bypass-it në Himarë pas informacioneve që policia kishte siguruar në rrugë operative.
Policia tha se i kishte bërë shenjë për të ndaluar shtetasit K.M., i cili drejtonte automjetin tip furgon.
Por 27-vjeçari nuk i është bindur urdhrit për të ndaluar dhe është larguar me shpejtësi.
Menjëherë, shërbimet e Policisë janë vënë në ndjekje të automjetit që drejtohej nga 27-vjeçari dhe kanë evidentuar disa metra më tutje, automjetin tip furgon, të braktisur.
Gjatë kontrollit në automjet, policia gjeti 33 emigrantë të paligjshëm nga vendet e Lindjes së Mesme, të cilët ky shtetas po i transportonte kundrejt fitimit.
Pas disa orësh nga braktisja e automjetit, në Laprakë, Policia e Tiranës ka mundur të ndalojë të dyshuarin.
Gjithashtu, gjatë kontrollit fizik të tij iu gjet dhe iu sekuestrua në cilësinë e provës materiale, një sasi e dyshuar lënde narkotike e llojit kokainë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
