.png)
Gazeta Si - Gjykata e Tiranës ka vendosur pushimin e çështjes për sekuestrimin e pasurisë prej 5 milionë eurosh të dy vëllezërve, Sokol dhe Elson Marku.
Në gjykatën penale të Tiranës u zhvillua seanca paraprake të premten nëse çështja do kalonte ose jo për gjykim.
Por përveç rrëzimit të kërkesës së prokurorisë, gjykata vendosi edhe pushimin e hetimeve për këtë çështje, duke urdhëruar heqjen nga sekuestro, të pasurive të familjes Marku.
Sipas prokurorisë, dyshohej se vëllezërit janë të përfshirë në aktivitet kriminal në trafikimin e lëndëve narkotike.
Vëllezërit Marku u hetuan për trafik droge, pastrim parash, dhënie të parave me fajde dhe tregti makinash.
Më herët, në kuadër të operacionit të koduar “Vëllazëria”, u ekzekutua kërkesa e Prokurorisë për sekuestrimin e pasurive të dy vëllezërve pas një hetimi të filluar në vitin 2019.
Gjatë operacionit u vendos sekuestro për 18 automjete, 3 sipërfaqe toke, 2 apartamente, 2 ndërtesa banimi, 2 ambiente bar-kafeje, 1 ndërtesë trekatëshe, me një vlerë të përafërt rreth 5 milion euro.
Në janar të këtij viti, njëri prej vëllezërve, si dhe një prej protestuesve të banorëve të '5 Majit', Elson Marku, kërcënoi kryetarin e Bashkisë së Tiranës, Erion Veliaj.
Marku, i kthyer edhe në subjekt të OFL-së, iu bëri thirrje banorëve që kanë armë të fshehura në shtëpi dhe acid, që t'ia hidhnin në sy kryebashkiaku.
Për këto deklarata, ai u shoqërua në polici dhe u procedua penalisht në gjendje të lirë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
