.png)
Nga Gazeta Si - Ministria e Kulturës ka shtyrë afatin e dorëzimit të aplikimeve për postin e drejtorit të Përgjithshëm të Teatrit Kombëtar të Operës dhe Baletit.
Njoftimi është bërë në faqen e Ministrisë ndërsa më herët drejtoresha aktuale, Zana Çela, e cila kërkon një mandat tjetër, u shpreh se afati duhej shtyrë pasi me mbylljen e aplikimeve më 19 prill ministria kishte bërë shkelje.
Sipas MK, afati është deri më datë 6 maj.
“Duke marrë shkas nga kërkesat e vazhdueshme për informacion, për të gjithë të interesuarit, afati i aplikimit për pozicionin drejtor i përgjithshëm i Teatrit Kombëtar të Operës, Baletit dhe Ansamblit Popullor, shtyhet deri në datën 6 maj 2022”, thuhet në njoftimin e Ministrisë.
Zana Çela u emërua në Teatrin Kombëtar të Operës, Baletit dhe Ansamblit Popullor në gusht të 2016, mandati i dytë i saj. Ajo erdhi në drejtimin e teatrit pas dorëheqjes së Ilir Kernit. Pak ditë më parë në një deklaratë për mediat, Çela konfirmoi rikandidimin për drejtoreshë e përgjithshme në TKOBAP , ndërsa e quajti konkursin diskriminues duke qenë se kriter për drejtorin e ri është edhe masteri shkencor në ekonomi.
Çela u shpreh se qeveria shqiptare e ka formatuar qartë, se çfarë kriteresh duhet të kenë titullarët në administratën e shtetit.
“Këto kritere nuk bien ndesh me CV-në time”, do të shprehej ndër të tjera Çela.
Ndërsa, ministrja e Kulturës, Elva Margariti, u shpreh se kriteri është rekomandues jo përjashtues.
Më datë 29 mars, Ministria e Kulturës shpalli konkursin për pozicionin: Drejtor i Përgjithshëm në Teatrin Kombëtar të Operës, Baletit dhe Ansamblit Popullor - Kategoria e pagës II-b, ku bëhej me dije se afati për dorëzimin e dokumenteve ishte deri më datë 19 të këtij muaji.
Në njoftim, ministria ka publikuar kriteret dhe kërkesat, ku mes tyre është dhe diploma e nivelit “Master Shkencor” në shkenca ekonomike ose menaxhim të artit kulturor.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
