.png)
Publikimi i vendimit të amerikanëve që shpallte non grata Aqif Rakipin dhe Ylli Ndroqin e gjeti Edi Ramën në një vizitë zyrtare në Berlin, ku i pyetur nga gazetarët e shmangu për momentin përgjigjen.
Interesimi i medias lidhej me emrin e Aqif Rakipit, djalin e të cilit Edi Rama e përfshiu në zgjedhjet parlamentare të 25 prillit, ku edhe u zgjodh deputet duke thyer herësin. Kryeministri premtoi se do të flasë, por nga Tirana.
“Të vijmë deri në Berlin për të folur për kandidatin e PS-së në Tiranë më duket pak e sforcuar, kështu që kalojmë tek pyetja tjetër. Këto janë pyetje që i takojnë katundit tonë të përbashkët dhe kur të rikthehemi në katund do t’i diskutojmë këto në lokalin e katundit tonë”, deklaroi Rama.
Departamenti amerikan i Thesarit njoftoi të hënën vendimin për sekuestrimin e pasurive të Aqif Rakipit dhe Ylli Ndroqit në SHBA, ose institucionet amerikane që veprojnë jashtë SHBA. Vendimi detyron këto institucione, publike e private që të raportojnë për çdo pasuri të këtyre dy personave.
Ndërkohë, në një reagim pas këtij vendimi, djali i Aqif Rakipit, deputeti Orlando Rakipi tha se babai i tij ishte ‘super i pastër’. Ai shprehu gatishmërinë që të hiqte dorë edhe nga mandati i deputetit.
“Babai im është super i pastër. Nuk kemi lidhje te ajo pjesë. Nuk e kuptoj atë kriminal. Jam i gatshëm të jap dorëheqjen. Babai im është super i pastër. Babai im edhe nga politika ka ikur për diçka skandaloze”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
