Gazeta Si – Kancelari i Gjykatës së Elbasanit, Ledio Sulkuqi, është goditur mbrëmjen e së dielës me leva nga disa persona të paidentifikuar.
Sulkuqi, 51 vjeç, është goditur sapo ka dalë nga një bar-kafe, e cila ndodhej vetëm 100 metra afër Drejtorisë së Policisë së Elbasanit.
Ai është goditur disa herë me leva në kokë e trup, por fatmirësisht ndodhet jashtë rrezikut për jetën. Sulkuqi mori ndihmën e parë në spitalin e Elbasanit, ku edhe do të pyetet nga policia mbi ngjarjen.
Dyshimet e para të policisë bien mbi konflikte të mundshme për shkak të detyrës, por mësohet se 51 vjeçari ka deklaruar se nuk ka konflikte me askënd dhe nuk a mundur të identifikojë autorët pasi goditja ka qenë e papritur.
Burime paraprake bëjnë me dije se kanë qenë të paktën dy persona që e kanë qëlluar, duke e lënë me plagë të rënda në kokë. Ata janë larguar me shpejtësi pas sulmit.
Ndërkohë që policia ka sekuestruar kamerat në vendngjarje dhe po punon për identifikimin e autorëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
