Gazeta Si – Një punonjës i Portit të Durrësit, Betim Kastrati u gjet i vdekur në aksin rrugor Fier-Lushnjë, në vendin e quajtur Kolonjë, ku sipas policisë dyshohet se ka vrarë veten me armë zjarri pistoletë.
Baba i dy fëmijëve të mitur, një vajze 13 dhe një djali 9-vjeç, ai ishte i punësuar si specialist pranë drejtorisë së shërbimeve në Autoritetin Portual Durrës dhe shpesh bënte dhe shoferin e drejtorit të përgjithshëm të APD-së Pirro Vengu.
Sipas policisë, Kastrati u gjet në aksin rrugor Fier-Lushnjë, në afërsi të rrethrrotullimit të Kolonjës, brenda në automjetin tip “Volvo” me targa AA 550 AI dhe nga veprimet e para hetimore u deklarua se ai kishte parkuar makinën në mënyrë të rregullt në një xhep të rrugës dhe ka vrarë veten me armë zjarri.
Të njohur të tij bëjnë me dije se Kastrati ishte me banim në Kamëz të Tiranës dhe çdo ditë udhëtonte drejt Durrësit për t’u paraqitur në punë. Ai ishte një tip mjaft sportiv, adhurues i arteve marciale dhe frekuentues i rregullt i palestrës. Aktualisht trupi i tij është dërguar për ekspertim në morgun e spitalit të Lushnjës.
Sipas të njohurve të tij, Kastrati në asnjë rast nuk ka shfaqur shenja depresioni që mund ta çonin drejt vetëvrasjes, ndërkohë që do të jenë hetimet e mëtejshme që do të zbardhin ngjarjen dhe kujt i përkiste arma e përdorur dhe e sekuestruar në vendin e ngjarjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
