Avioni i rrëzuar në fillim të muajit tetor në zonën e Vermoshit drejtohej nga dy shtetas shqiptarë, që policia dhe prokuroria i ka shpallur në kërkim.
Identiteti i personave nuk bëhet me dije nga ana e grupit hetimor, me arsyetimin se hetimet vijojnë, por burime zyrtare të cituara nga ABC thonë se identifikimi i tyre është bërë mbi bazën e gjurmëve të gishtërinjve që janë analizuar në mjet dhe fijet e flokëve të gjetura po aty.
Grupi hetimor thotë se është duke punuar për të identifikuar dhe gjetur edhe personat e tjerë që mund të kenë lidhje, ose dijeni me këtë ngjarje nën dyshimet se në momentin e defektit, avioni ka qenë duke u përdorur për transport droge.
Mënyra e sofistikuar e transportit ka shtyrë grupin hetimor në dyshimet se pas ngjarjes qëndrojnë grupe të fuqishme kriminale, ndërsa prova janë siguruar edhe në lidhje me makinën fuoristradë me të cilën dyshohet se u larguan dy personat që ndodheshin në avion.
Sipas dëshmive të banorëve vendas, makina ishte pa targa dhe e ngjashme me mjetet e përdorura nga policia kufitare në këtë zonë. Dyshohet se destinacioni i drogës ka qenë Mali i Zi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
