.png)
Drejtori i Drejtorisë së Administrimit dhe Mbrojtjes së tokës në Vlorë, Bardhyl Gjika dhe specialisti i këtij dikasteri, Kreshnik Mino, janë arrestuar këtë të premte, pasi dyshohen si të përfshirë ose si persona që kanë dijeni në lidhje me vjedhjen e ndodhur 4 ditë më parë në zyrat e qarkut.
Në kuadër të operacionit të koduar “Formulari”, në pranga ka rënë edhe shtetasi Spiro Duni. Burime nga policia, kanë sqaruar se një AMTP dhe formulari 6 i regjistrimit të një prone truall në Dhërmi ishin falsifikuar në favor të shtetasit Duni.
Dyshohet e këta persona kishin bashkëpunuar me njëri-tjetrin në falsifikimin e dokumenteve të pronësisë së një toke në Dhërmi, por më pas nga frika për të mos u kapur inskenuan vjedhjen e dosjeve.
Sipas informacioneve paraprake, dyshohet se çështja pronësore e familjes Duni po gjykohet pasi ka pasur pretendime për falsifikime.
Dokumentet origjinale janë kërkuar të vihen në dispozicion të organeve të drejtësisë dhe për të mos u zbuluar falsifikimi, funksionarët e këshillit të Qarkut kanë organizuar vjedhjen e tyre.
Këto dokumente janë origjinale vetëm në këtë zyrë dhe nuk janë administruar nga Agjencia Shtetërore e Kadastrës. Policia nuk specifikon se cili është personi që është futur i armatosur në zyrat e pronave.
Pas ngjarjes, vetë Gjika foli për mediat, duke e konsideruar vjedhjen një akt të rëndë që ndodhte në zyrat më me rëndësi të qarkut.
Ndërkohë, kreu i Këshillit të Qarkut, Ervis Moçka, ka firmosur pezullimin nga detyra për dy punonjësit këtij institucioni të ndaluar nga policia, Bardhyl Gjika dhe Kreshnik Mino.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
