Një turist nga Ukraina, ka humbur jetën ndërsa ishte duke u larë në det në plazhin e Golemit në Kavajë. Ngjarja ka ndodhur paraditen e të martës dhe mësohet se shtetasi A.G., 66 vjec është nxjerrë nga uji nga pushuesit e tjerë, por nuk ka mundur të mbijetojë.
Ky është rasti i tretë brenda dy ditësh i mbytjes së pushuesve në plazhet e vendit, si dhe viktima e katërt. Të dielën e shkuar, humbën jetë tre turistë, dy në plazhin e Spillesë dhe një në Velipojë.
Dy pushuesit që u mbytën në Spille, ishin nga Maqedonia e Veriut, kurse në Velipojë humbi jetën një 59-vjeçar nga Kosova.
Prej vitesh tashmë, problematikë në plazhet shqiptare është mungesa e rojeve bregdetare dhe në pjesën më të madhe të rasteve angazhohen pushuesit për t’u dhënë ndihmën e parë personave që rrezikojnë mbytjen në det.
Nga fillimi i sezonit veror dhe deri më tani, dyshohet se rreth 20 persona kanë humbur jetën në plazhe, liqene dhe lumenj si pasojë e mbytjes.
Gjatë këtij sezoni nuk kanë munguar rastet kur pushuesit janë ankuar se në plazhe mungojnë vrojtuesit, ç’ka do të ishte efikase për shpëtimin e jetës së njerëzve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
