.png)
Pavarësisht eliminimit të shpejtë në Europian, Didier Deshamp do të qëndrojë në krye të Francës edhe për Botërorin 2022. E ka konfirmuar lajmin vetë presidenti i Federatës Franceze të Futbollit, Noel Le Graet, në një intervistë për “Le Figaro”. "Deshamp do të jetë trajner i Francës edhe në Katar, e zgjidhëm çështjen në 3 minuta. Dëshira e tij është të vazhdojë, edhe dëshira ime kjo ishte. Nuk pati asnjë diskutim”, - tha Le Graet.
E njëjta gjë ka ndodhur edhe me trajnerin e Belgjikës, Roberto Martinez, i konfirmuar deri në Kupën e Botës 2022. Lajmin e ka bërë të ditur vetë trajneri spanjoll gjatë një konference shtypi: "Jam i përqendruar te kualifikueset e Botërorit dhe te “Final Four” e Ligës së Kombeve. Kemi folur shpesh për të ardhmen time, para dhe gjatë Europianit, por në mendjen time ishte shumë e qartë".
Me kontratë që prej korrikut të vitit 2016, Martinez është i lidhur me Federatën Belge të Futbollit deri në fund të Botërorit 2022 në Katar. Federata kishte konfirmuar që të mërkurën se do të qëndronte Martinez, pavarësisht ecurisë zhgënjyese në Europian të “Djajve të kuq”, të eliminuar në çerekfinale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
