.png)
Zyra e Bashkimit Europian në Tiranë konfirmoi se Ambasadori Luigi Soreca ka zhvilluar një takim me kryetaren e Gjykatës Kushtetuese më 16 qershor para se kjo gjykatë të mblidhej në seancën e radhës plenare për të diskutuar padinë për çështjen e Teatrit Kombëtar.
“Delegacioni i BE-së në Shqipëri konfirmon që Ambasadori Soreca është takuar me Kryetaren e Gjykatës Kushtetuese, Znj. Vitore Tusha, mëngjesin e 16 qershorit 2021”, thuhet në deklaratë.
Por, përmes një deklarate, Zyra e BE hedh poshtë të gjitha akuzat se Ambasadori u takua fshehurazi dhe me qëllim lobimin për llogari të Bashkisë së Tiranës në këtë gjykatë.
“Delegacioni i Bashkimit Europian në Shqipëri përgënjeshtron me forcë deklaratat e bazuara në shpifje prej një përfaqësueseje të Aleancës për Mbrojtjen e Teatrit Kombëtar drejtuar Ambasadorit Luigi Soreca”, vijon deklarata.
Sipas Delegacionit, takimi ka qenë i planifikuar dhe pjesë e një serie takimesh që Soreca po zhvillon me krerët e institucioneve të drejtësisë.
“Për të diskutuar mbi gjendjen e zbatimit të reformës në drejtësi në Shqipëri. Gjatë takimit nuk pati asnjë diskutim në lidhje me çështjen e hapur në Gjykatë mbi Teatrin Kombëtar. Delegacioni i BE-së në Shqipëri dhe Ambasadori Soreca vazhdojnë të mbështesin fuqimisht dhe në mënyrë sistemike pavarësinë e të gjitha institucioneve gjyqësore shqiptare”, thuhet në reagimin e BE.
Në fund, delegacioni i BE-së thotë se rezervon çdo të drejtë për të ndjekur ligjërisht deklaratat e bazuara në shpifje të bëra në media.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
