Video/ Zvicra bën goditjen e madhe, kampionët e botës ndëshkohen nga Mbape

Europiani humb edhe kampionët në fuqi të botës, Francën, ndërsa Zvicra bën surprizën e madhe, duke shkuar në çerekfinale kundër çdo parashikimi. Të frymëzuar nga Spanjë-Kroaci, që u mbyll 3-3 në kohën e rregullt, edhe francezët dhe zviceranët shënuan po kaq gola disa orë më vonë, nga 3 për secilën skuadër, për ta çuar ndeshjen në shtesë e më pas me penallti. Por nëse Spanjës iu desh shtesa për t’u kualifikuar, Francës kampione bote nuk i bënë punë as penalltitë.

Haris Seferoviç shtangu kampionët e botës, duke shënuar me kokë në portën e Loris në pjesën e parë. Të kota përpjekjet e francezëve në këtë pjesë për të gjetyur golin e barazimit. Pas pushimit mes pjesë, Deshamp hodhi në fushë Komanin dhe hoqi mbrojtësin Lengle, duke shtuar forcat sulmuese në fushë.

Në minutën e 55-të, Zvicra pati shansin të mbyllte ndeshjen, pasi fitoi një penallti me VAR, por kapiteni Hugo Loris shpëtoi të tijtë, duke pritur gjuajtjen e Rikardo Rodriguez. Ishte momenti i kthesës për Francëm, që për dy minuta realizoi dy herë me sulmuesin Karim Benzema.

Pol Pogba shënoi një supergol me një goditje të kalibruar nga jashtë zonës dhe 3-1. Zviceranët nuk u dorëzuan dhe shkurtuan diferencën me Seferoviç, sërish me kokë, ndërsa në minutën e fundit të kohës së rregullt Gavranoviç baraspeshoi gjithçka në 3-3, pas një pasimi të Granit Xhakës. Me fat Zvicra në sekondën e fundit, kur Koman goditi traversën e Somer dhe kualifikimi iu la 30 minutave shtesë.

Deshamp ndërroi Benzemanë me Zhiru dhe më pas u detyrua të ndërronte edhe Komanin e dëmtuar me Markus Thuram. Në anë tjetër, Petkoviç forcoi mbrojtjen me Shar, duke larguar nga fusha sulmuesin Seferoviç. Mbape humbi një rast të mirë për golin e katërt dhe pastaj gjithçka u vendos nga penalltitë, ku i vetmi që gaboi në 10 penallti ishte Kilian Mbape, që u ndal nga Somer. Festojnë Xhaka, Shaqiri dhe Mehmedi.

Francë-Zvicër 7-8 (3-3)
Franca (3-4-1-2): Loris, Varane, Lenglet (Koman-Turam), Kimpembe, Pavard, Pogba, Kante, Rabiot, Grizman (Sisoko), Benzema (Zhiru), Mbape. Trajner: Deshamp
Zvicra (3-4-1-2): Somer, Elvedi, Akanzhi, Rodriguez (Mehmedi), Vidmer (Mbabu), Freuler, Xhaka, Zuber (Fasnaht), Shaqiri (Gavranoviç), Embolo (Vargas), Seferoviç (Shar). Trajner: Petkoviç
Arbitër: Rapalini (Arjgentinë)
Shënues: Seferoviç 15', 81’, Benzema 57’, 59’, Pogba 75’, Gavranoviç 90’
Penalltitë: Gavranoviç gol, Pogba gol, Shar gol, Zhiru gol, Akanzhi gol, Turam gol, Vargas gol, Kimpembe gol, Mehmedi gol, Mbape pret portieri

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.