.png)
Do jenë të paktën 60 mijë spektatorë në stadiumin “Wembley” për dy ndeshjet gjysmëfinale dhe finalen e Euro 2020, që do të zhvillohet më 11 korrik. Qeveria britanike ka bërë të ditur me një komunikatë zyrtare se kapaciteti i stadiumit londinez për 3 ndeshjet e fundit të Europianit do të jetë në kuotën 75%.
Gjatë tri ndeshjeve të luajtura në fazën e grupeve, në “Wembley” është lejuar vetëm 25% e kapacitetit. Ditët e fundit ishin shtuar zërat për një spostim të mundshëm të finales për shkak të rregullave në Mbretërinë e Bashkuar. U tha fillimisht se UEFA kishte zgjedhur Budapestin si alternativë, por më pas institucioni që drejton futbollin europian bëri me dije se ishte duke punuar me autoritetet angleze për shtimin e tifozëve.
Një ditë më parë një qëndrim për këtë çështje mbajti edhe kryeministri italian, Mario Dragi, i cili tha se nuk mund të luhet finalja nënjë vend ku ka shtim të shpejtë të numrit të të infektuarve nga varianti Delta i Covid-19. Gjithsesi, tani gjithçka ka marrë zgjidhje: finalja mbetet më Londër, me 60 mijë spektatorë. Edhe Ministri britanik i Shëndetit, Matt Hancock, ka konfirmuar se "finalja do të luhet në Wembley".
Presidenti i UEFA-s, Aleksander Ceferin, i shprehu menjëherë mirënjohjen kryeministrit britanik dhe qeverisë së tij për punën e fuqishme që kanë bërë për të arritur akordin me institucionin që slloveni drejton.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
