.png)
“Kam në plan të lëviz, sepse finalja nuk mund të luhet në një vend, ku numri i infektimeve po rritet me shpejtësi”. Janë fjalët e kryeministrit italian Mario Dragi gjatë një konference shtypi të dhënë bashkë me kancelaren gjermane Angela Merkel, kur ai është pyetur në lidhje me transferimin e mundshëm të finales së Euro 2020 nga Londra në Romë. Një pyetje që vjen për shkak të rritjes së të infektuarve në Mbretërinë e Bashkuar.
Qëndrimi i Dragit ndaj Anglisë në fakt është në kundërshtim me vullnetin e UEFA-s, që i ka kërkuar qeverisë angleze ta rritë në 65 mijë spektatorë kapacitetin e stadiumit “Wembley” për gjysmëfinalet dhe finalen. Nuk ka vonuar replika, pas fjalëve të Dragit.
“UEFA, federata angleze dhe autoritetet angleze po punojnë ngushtë për organizimin e gjysmëfinaleve dhe finales së Euro 2020 në “Wembley” dhe nuk ka plane për ndryshimin e stadiumit për këto ndeshje”, - ka bërë të ditur UEFA me anë të një komunikate zyrtare.
Kancelarja gjermane, Angela Merkel, ka bërë edhe pak humor, duke thënë se me Dragin ka folur për Gosens, lojtarin e Atalantës që po bën shumë mirë edhe me Gjermaninë. “Në marrëdhëniet mes Italisë dhe Gjermanisë nuk ka probleme, përveç diferencave futbollistike, - ka thënë Merkel. – Kemi pozicione të ndryshme. Italia luan mirë, por ne bëjmë tifo për skuadrën tonë. Gjithsesi, të dyja palët mendojmë se gjermani Gosens i Atalantës është një lojtar shumë i mirë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
