Shkalla e dëmit të shkaktuar nga COVID-19 në turizmin global është paraqitur në një raport të ri gjithëpërfshirës për kufizimet e udhëtimit nga Organizata Botërore e Turizmit (UNËTO). Raporti referues, i botuar në një kohë të një bllokimi të paparë kurrë më parë për sektorin, tregon se pothuajse të gjitha destinacionet globale kanë vendosur kufizime në udhëtime që nga janari i vitit 2020, duke përfshirë edhe ndalime të plota për të gjithë udhëtimet, teksa qeveritë punojnë për të mbajtur nën kontroll pandeminë.
Gjatë viteve të fundit, si agjensi e specializuar e Kombeve të Bashkuara për turizmin, Organizata Botërore e Turizmit ka monitoruar rregullisht lehtësimin e udhëtimeve dhe ka vërejtur vitet e fundit një prirje të vazhdueshme drejt hapjes. Por, COVID-19 e ka ndërprerë në mënyrë dramatike këtë hapje. Sipas hulumtimeve të kryera për raportin e ri, që nga 6 Prilli, 96% e të gjithë destinacioneve në të gjithë botën kanë urdhëruar kufizime të udhëtimit në përgjigje të pandemisë. Rreth 90 destinacione kanë mbyllur plotësisht ose pjesërisht kufijtë e tyre për turistët, ndërsa 44 të tjera janë të mbyllura për disa turistë në varësi të vendit të origjinës.
Efekt në jetën dhe jetesën
Sekretari i Përgjithshëm i Organziatës Botërore të Turimzit, Zurab Pololikashvili është shprehur se: “COVID-19 ka ndikuar në udhëtime dhe turizëm si asnjë ngjarje tjetër më parë në histori. Qeveritë e kanë vendosur shëndetin publik të parën dhe kanë prezantuar kufizime të plota ose të pjesshme në udhëtime. Me pezullimin e turizmit, përfitimet që sjell sektori janë nën kërcënim: miliona vende pune mund të humben, dhe përparimi i bërë në fushat e barazisë dhe rritjes së qëndrueshme ekonomike mund të kthehet përsëri mbrapsht. Prandaj Organziata u bën thirrje qeverive të rishikojnë vazhdimisht kufizimet e udhëtimit dhe t’i lehtësojnë ose heqin ato sa më shpejt që të jetë e sigurt për ta bërë këtë. “
Raporti më i fundit i Organziatës Botërore të Turizmit tregon se rajonet globale janë kryesisht konsistente në përgjigjen e tyre ndaj COVID-19. Në Afrikë, Azi dhe Paqësor e Lindjen e Mesme, 100% e destinacioneve kanë miratuar kufizime të lidhura me COVID-19 që nga janari i vitit 2020. Në Amerikë, 92% e destinacioneve kanë ndërmarrë hapa të ngjashëm, ndërsa në Europë, 93% e destinacioneve janë mbyllur (nga 6 Prilli).
Niveli i përgjigjes në evoluim
Më konkretisht, analiza identifikon katër lloje kryesore të masave kufizuese, përkatësisht:
Mbyllja e plotë ose e pjesshme e kufijve për turistët;
Kufizimet specifike të destinacionit (“Pasagjerët që kanë kaluar ose kanë qenë në x vend nuk lejohen të hyjnë në x tjetër vend”);
Pezullimi i plotë ose i pjesshëm i fluturimeve;
Masat e ndryshme, përfshirë kërkesat për karantinë ose izolim të vetes, çertifikatat mjekësore, pavlefshmërinë ose pezullimin e lëshimeve të vizave etj.
Rimëkëmbja në kohë dhe e përgjegjshme
Në shumë raste, destinacionet tashmë kanë rregulluar masat e tyre kufizuese pasi situata ka evoluar. Organizata Botërore e Turimzit do të vazhdojë të ndjekë dhe analizojë rregullisht evolucionin e kufizimeve të udhëtimit, në një përpjekje për të mbështetur në mënyrë të përgjegjshme rekuperimin në kohë të sektorit të turizmit./organizatabotëroreeturizmit/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
