.png)
Nga Gazeta ‘SI’ – Institucionet që menaxhojnë fondet e BE-së në Shqipëri do t’i nënshtrohen kontrolleve më të rrepta për shmangien e abuzimeve të mundshme.
Me kërkesë nga OLAF dhe BE, qeveria parashikon krijimin e AFCOS, shërbimin e Koordinimit Kundër Mashtrimit, në bashkëpunim me me BE-në. Rrjeti AFCOS, i caktuar nga Ministri i Financave, ka në përbërje të gjitha autoritetet kombëtare të përfshira në parandalimin, raportimin dhe eliminimin e parregullsive në lidhje me mbrojtjen e interesave financiare të Bashkimit Evropian me të cilat janë lidhur marrëveshje bashkëpunimi.
Në strategjinë e hedhur për konsultim “Strategjia Kombëtare kundër Mashtrimit për Mbrojtjen e Interesave Financiare të Bashkimit Evropian”, synohet zbulimi i mashtrimeve të zyrtarëve me fondet europiane. Janë disa rreziqe thotë dokumenti, se si mund të keqpërdoren fondet e Bashkimit Europian në Shqipëri; kosto të fryra të projekteve, dhënia e kontratës pa meritë, pagesa për shkelësit e kontratës, përcaktim i fituesit etj.
Po ashtu parashikohet krijimi i ARACHNE, një instrument i avancuar i teknologjisë së informacionit, i krijuar për të ndihmuar autoritetet menaxhuese të identifikojnë projekte me rrezik të lartë, duke analizuar grupe të mëdha të dhënash që lidhen me projektet e financuara nga BE-ja.
Drafti tregon se numri i përgjithshëm i parregullsive të raportuara për periudhën 2020-2024 është 199 nga të cilat 146 të raportuara gjatë zbatimit të Programit IPARD dhe 53 të raportuara në Programin IPA.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
