Në ceremoninë e mbajtur për 109-vjetorin e Policisë së Shtetit, kryepolici Gledis Nano, apeloi vartësit e tij të mos shpërdorojnë besimin e qytetarëve, të sillen humanë me ta dhe të ashpër me shkelësit e ligjit.
Ai tha se sytë dhe vëmendja e qytetarëve janë më së shumti të drejtuar nga policia, e cila ka për detyrë të ruajë rendin dhe të krijojë siguri në shkolla, parqe, lokale, banesa e kudo.
“Është koha të fitojmë sa më shumë vetëbesim që t’u ofrojmë qytetarëve në shërbim sa më cilësor, të tregohemi humanë e socialë dhe me kulturë me qytetarët, por edhe të vendosur dhe të ashpër me shkelësit e ligjit”, – u shpreh Nano.
Ministri i Brendshëm Bledi Çuçi tha gjatë fjalës së tij se sot, Policia e Shtetit ka standard të lartë profesionalizmi. Sipas Çuçit, kjo u tregua më së miri në protestën e dhunshme të Sali Berishës më 8 janar. Një urim për Policinë e Shtetit në këtë ditë pati edhe kryeministri Edi Rama.
Nano theksoi e për herë të parë, disa rrugë do të pagëzohen me emra martirësh, mbi të cilat do të kalojnë e pikëtakohen gjenerata të ndryshme.
Ai u shpreh, se pas kësaj ceremonie, jo vetëm në Tiranë, por në disa qarqe të vendit, disa rrugë që nga sot e tutje, me iniciativë të Policisë së Shtetit dhe mbështetje të pushtetit vendor, do të pagëzohen me emrat e policëve të rënë.
“Jo vetëm do të njohim e të kuptojmë përjetësinë e këtyre emrave, por me gjasë do të na duhet të shohim se ata më tepër se kushdo tjetër, do të vijojnë në një tjetër formë, misionin e tyre në komunikimin e përditshëm me qytetarët, duke qëndruar si etalone të kujtesës, në mbrojtje dhe edukimin e tyre me vlerat me të larta morale, qytetare e patriotike”, tha Nano.
Krijimi i Policisë shqiptare lidhet me shpalljen e Pavarësisë dhe krijimin e shtetit shqiptar në vitin 1912. Me 4 dhjetor 1912, u krijua Ministria e Brendshme, e cila përgjigjej për ruajtjen e rendit e të qetësisë publike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
