Rama: Brenda qershorit 500 mijë të vaksinuar, bisedime për një fabrikë prodhimi vaksinash në Shqipëri

192 mijë dozat e para të vaksinës kineze mbërritën në Shqipëri rreth orës 16:00 të së enjtes, me të njëjtin fluturim me të cilin Kryeministri Edi Rama u kthye në atdhe nga vizita e shkurtër në Stamboll.

Mbërritja e këtyre vaksinave u paralajmërua nga kreu i Qeverisë para nisjes prej Stambollit. Përmes një lidhje të drejtpërdrejtë në rrjetet sociale, ai tregoi momentin e ngarkimit të tyre në avionin e “Air Albania”, ndërsa shënimi shoqërues zbulonte disa detaje nga kontrata me kompaninë turke që sjell këto vaksina.

Sipas Ramës, Shqipëria do të marrë 1 milion vaksina kineze brenda dy muajve të ardhshëm, ndërsa në momentin e zbritjes së dërgesës së parë në Rinas, kreu i Qeverisë zbulon se objektiv është vaksinimi i plotë, pra me të dyja dozat, e 500 mijë qytetarëve shqiptarë brenda muajit qershor.

Por, marrja e vaksinave nuk ishte i vetmi mision i Ramës në Stamboll. Ai tha se kanë nisur bisedimet me kompaninë turke për një projekt ambicioz.

“Kemi nisur edhe bisedat për të sjellë në Shqipëri fabrikën e prodhimit të vaksinave, një fabrikë e teknologjisë së lartë, e cila aktualisht është një ndër kompanitë më të mëdha farmaceutike në botë, kompania farmaceutike që bën edhe shpërndarjen e vaksinës Sinovac, por që në të njëjtën kohë është prodhuese e shumë vaksinave të tjera dhe produkteve të tjera farmaceutike. Kemi nisur bisedimet për të sjellë në Shqipëri një investim shumë të rëndësishëm, jo vetëm për këtë moment, por për të ardhmen, fabrikë prodhuese që do të hapë një tjetër faqe të rëndësishme në zhvillimin e Shqipërisë”, tha Rama.

Me dozat relativisht të konsiderueshme me dozat që ka marrë deri më tani Shqipëria, kreu i Qeverisë dërgoi një mesazh të përforcuar në drejtim të Kosovës.

“Jemi gati menjëherë që prej nesër të marrim përsipër vaksinimin e të gjitha bluzave të bardha në Kosovë. Janë 11 mijë bluza të bardha në Kosovë dhe brenda 11 ditësh jemi gati të kryejmë vaksinimin e të gjithëve”, tha ai.

Sa i takon procesit të vaksinimit në Shqipëri, Rama deklaroi se ai do të shtrihet në të gjithë vendin, edhe me tre turne nëse është e nevojshme.

“Vaksinimi do të fillojë në të gjithë vendin dhe orar të posaçëm vaksinimi deri në mesnatë dhe nëse është e nevojshme edhe me tre turne”, u shpreh ai.

Dozat e vaksinës kineze pasojnë dhuratën me 10 mijë vaksina ruse nga Emiratet e Bashkuara Arabe mbërrijnë dy ditë nga publikimi i vendimit të Qeverisë në Fletoren Zyrtare për marrjen e tyre. E përbashkëta e vaksinës kineze me atë ruse është fakti se që të dyja vaksinat nuk janë të autorizuara ende nga Agjencia Europiane e Barnave dhe që të dyja, Shqipëria i merr prej vendeve të treta. Në rastin e Sputnik si dhuratë nga një princ i Emirateve dhe në këtë rast përmes një kompanie turke.

Qeveria thotë se me futjen edhe të vaksinës kineze do të nisë vaksinimi masiv i popullsisë. Synimi është kryerja e 15 mijë vaksinimeve në ditë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.