.png)
Pasditen e sotme (4 korrik) një vatër zjarri është aktivizuar në një zonë pyjore në Dhërmi.
Flakët janë përhapur me shpejtësi pasi janë favorizuar nga era e fortë, duke djegur edhe sipërfaqe toke me pemëtari dhe ullinj.
Ministri i Brendshëm, Taulant Balla ka reaguar me anë të një statusi në rrjetet sociale, ku bën me dije se shërbimet zjarrfikëse dhe forcat e armatosura po punojnë për shuarjen e këtij zjarri.
Mësohet se ndihmë të shërbimeve zjarrfikëse kanë ardhur edhe banorët e zonës.
Policia njofton se shkak për rënien e këtij zjarri është bërë një shkëndije elektrike si pasojë e tensionit të lartë në atë lagje.
Agjencia e Mbrojtjes Civile u ka bërë thirrje qytetarëve të shmangin rrugën në Qafën e Llogarasë për shkak të zjarrit që është aktivizuar në zonë.
Mbrojtja Civile u bën thirrje dhe drejtuesve të mjeteve të ndjekin udhëzimet e Policisë së Shtetit dhe emergjencave civile për lëvizjen e tyre, në mënyrë që të lejohen mjetet dhe efektivët të punojnë për shuarjen e zjarrit.
Njoftim për qytetarët nga Agjencia e Mbrojtjes Civile:
Për shkak të situatës së krijuar nga zjarri i rënë në qafën e Llogarasë, në një sipërfaqe me shkurre e barishte dhe që ka shkaktuar tym, u bëjmë thirrje të gjithë qytetarëve të shmangin kalimin në këtë rrugë. Forcat zjarrfikëse dhe të emergjencave janë duke punuar për të vënë në kontroll situatën.
U bëjmë thirrje të gjithë drejtuesve të mjeteve të ndjekin udhëzimet e Policisë së Shtetit dhe emergjencave civile për lëvizjen e tyre, në mënyrë që të lejohen mjetet dhe efektivët të punojnë për shuarjen e zjarrit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
