.png)
Nga Gazeta ‘Si’- Presidenti i SHBA-ve, Donald Trump, do të takohet me Presidentin ukrainas Volodymyr Zelensky të dielën në Mar-a-Lago.
Kështu ka bërë me dije gazetari i Axios, Barak Ravid, në platformën sociale X, duke cituar një zyrtar ukrainas.
Zelensky ka thënë më herët se planifikon të takohet së shpejti me Trump, dhe se shumë gjëra mund të vendosen para Vitit të Ri, ndërsa Washingtoni po nxit përpjekjet diplomatike për t’i dhënë fund luftës me Rusinë.
Zelensky ka thënë se çështjet e ndjeshme, përfshirë çdo kompromis mbi territorin, duhet të diskutohen në nivelin e krerëve të shteteve, dhe Kievi ka kërkuar një takim ballë për ballë me Trump.
“Kemi rënë dakord për një takim në nivelin më të lartë – me Presidentin Trump në të ardhmen e afërt. Shumë gjëra mund të vendosen para Vitit të Ri”, tha ai në X pas raundit të fundit të bisedimeve midis negociatorëve ukrainas dhe amerikanë.
Zelensky zhvilloi bisedime të enjten me të dërguarin special të Trump, Steve Witkoff, dhe dhëndrin e presidentit, Jared Kushner.
Ai tha se disa dokumente, pjesë e një kuadri më të gjerë që synonte t’i jepte fund konfliktit dhe të siguronte rindërtimin e Ukrainës, ishin “pothuajse gati”, ndërsa të tjerat ishin “plotësisht të përgatitura”.
Më herët këtë javë, Zelensky zbuloi një draft plan paqeje prej 20 pikash që ai e përshkroi si kuadrin kryesor për t’i dhënë fund luftës.
Teksa plani përcaktonte që Ukraina të merrte garanci sigurie për të parandaluar agresionin e mëtejshëm rus, nuk pati kompromis midis Ukrainës dhe SHBA-ve për çështjet e territorit, të cilin Moska po kërkon që Kievi ta lëshojë.
Kontrolli mbi termocentralin bërthamor të pushtuar të Zaporizhzhisë mbeti gjithashtu çështje diskutimi e mëtejshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
