Zelenski në Paris: Rusia nuk duhet të shpërblehet për luftën (Macron e mbështet)

Gazeta Si – Liderët europianë kanë mbështetur presidentin ukrainas Volodymyr Zelenski këtë të hënë pas bisedimeve SHBA‑Ukrainë për rishikimin e propozimit për paqe që fillimisht favorizonte Rusinë, ndërsa i dërguari i Donald Trump u nis drejt Moskës për të informuar Kremlinin.

Në një konferencë për shtyp midis presidentit francez Macron dhe homologut të tij ukrainas, Zelenski, shefi i Pallatit Elize theksoi se Ukraina është “i vetmi vend që mund të flasë për territorin (e saj)”.

“Shtetet e Bashkuara kanë marrë përsipër një rol ndërmjetësues dhe unë përgëzoj punën e bërë nga ekipi amerikan i udhëhequr nga presidenti Trump”, tha Macron.

Presidenti francez shtoi se “të gjithë” kanë një rol për të luajtur në vendosjen e paqes. Por, theksoi ai, “Ukraina është i vetmi vend që mund të flasë për territorin”.

Presidenti francez kritikoi gjithashtu faktin se Evropa dhe i ashtuquajturi “koalicion i të vullnetshmëve” nuk janë në tryezën e negociatave.

Shtetet e Bashkuara më parë propozuan një plan me 28 pika për t’i dhënë fund luftës. Plani fillestar me 28 pika u kritikua ashpër në Ukrainë dhe Evropë.

Lufta në Ukrainë “duhet të përfundojë me dinjitet” dhe “Rusia nuk duhet të shpërblehet për këtë luftë, në mënyrë që asnjë vend të mos tundohet të ndjekë të njëjtën rrugë”.

Kështu u shpreh presidenti ukrainas Volodymyr Zelenski gjatë konferencës së përbashkët për shtyp me presidentin francez Emmanuel Macron në Paris.

“Fatkeqësisht, lufta vazhdon”, vazhdoi udhëheqësi i Kievit. “Po shohim një rritje të sulmeve me dronë dhe raketa. Kjo po ushtron presion të fortë, jo vetëm psikologjikisht, por edhe fizikisht, mbi popullsinë tonë, vetëm për të thyer ukrainasit”. “Po dëshmojmë ndryshime të mëdha këto ditë”, tha Zelenski, duke falënderuar presidentin e SHBA-së Donald Trump “për ndihmën e tij” dhe duke njoftuar se do të takohet përsëri me të në të ardhmen.

Zelenski dëshiron të diskutojë “pikat kyçe” të planit të paqes të SHBA-së për t’i dhënë fund luftës ruse në Ukrainë me homologun e tij amerikan Donald Trump.

“Shpresojmë të diskutojmë pikat kyçe (të planit) me presidentin e Shteteve të Bashkuara, të cilat janë mjaft komplekse”, tha Zelenski.

Gjatë konferencës për shtyp, Zelenski theksoi se garancitë e sigurisë janë thelbësore për vendin e tij. “Popullsia është përparësia jonë. Prandaj, ne duhet t’u garantojmë qytetarëve tanë se nuk do të ketë agresion të mëtejshëm”, tha Zelenski.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.