Yield-et e bonove 12-mujore pësuan një rënie të mëtejshme në ankandin e kësaj jave.
Sipas të dhënave të Bankës së Shqipërisë, yield-i mesatar i ponderuar zbriti në 1.46%, nga 1.52% që ishte në ankandin e mëparshëm.
Yield-i i regjistruar në ankandin e kësaj jave shënon nivelin e ri më të ulët të dy viteve të fundit.
Nga 8.14 miliardë lekë që ishte shuma e shpallur për financim nga Ministria e Financave, kërkesat totale në ankand arritën vlerën e 10.4 miliardë lekëve.
Pjesa e ofertave konkurruese të pranuara po qëndron në nivele të ulëta, me 28.14%.
Këtë javë u zhvillua gjithashtu edhe ankandi i bonove tremujore, ku yield-i mesatar i ponderuar rezultoi 0.96%, me një rritje shumë të lehtë nga niveli 0.89% i ankandit të mëparshëm, që ishte zhvilluar në muajin maj.
Në këtë ankand, Ministria e Financave shiti 858 milionë lekë bono dhe kërkesa ishte e njëjtë me shumën e shpallur për financim
Kjo kërkesë më e ulët nga tregu mund të shpjegojë rritjen, sado të vogël, të yield-eve për këto instrumente. Për shkak të kthimeve relativisht të ulëta dhe maturimit të shpejtë, bonot 3 dhe 6 mujore tërheqin më pak interes nga investitorët krahasuar me titujt më afatgjatë.
Për tremujorin e dytë të vitit, qeveria shqiptare planifikoi një huamarrje totale, duke përfshirë edhe rifinancimet, prej rreth 89 miliardë lekësh, nga pothuajse 97 miliardë lekë në tremujorin e parë.
Kjo nënkupton një kërkesë në rënie për financim dhe më pak trysni për rritje të yield-eve. Për tremujorin e tretë kalendari i huamarrjes nuk është publikuar ende, megjithatë nuk pritet ndonjë luhatje që të mund të ndikojë shumë balancat e tregut.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
