.png)
Gazeta Si – Që kur u bë udhëheqës i Kinës në vitin 2012, Xi Jinping ka përdorur vazhdimisht dorëheqje të detyruara dhe hetime disiplinore për të frenuar radhët e ushtrisë.
Por largimet e fundit ushtarake janë më intensivet dhe më të gjera në vitet e fundit dhe kanë pasur disa karakteristika të habitshme. Për shembull, Xi Jinping ka larguar njerëz që ai vetë i kishte emëruar dhe i konsideronte besnikë ndaj tij.
Nga njëra anë, forcat e armatosura kineze konsiderohen ndër më të fortat në botë dhe kohët e fundit kanë demonstruar përparime të rëndësishme teknologjike, të tilla si krijimi i një sistemi portesh lundruese për pushtime nga deti (të cilat mund të përdoren kundër Tajvanit) ose ndërtimi i shpejtë i transportuesve të rinj të avionëve.
Nga ana tjetër, spastrimet e vazhdueshme brenda ushtrisë tregojnë dy probleme të mundshme: korrupsionin dhe besimin tek udhëheqja politike, përkatësisht Xi Jinping.
Vetëm në pak muaj, Komisioni Qendror Ushtarak, organi përmes të cilit Partia Komuniste ushtron kontroll mbi ushtrinë, ka kaluar nga shtatë në katër anëtarë (njëri prej të cilëve është Xi).
Që nga marsi, Gjenerali He Weidong, një anëtar i Komisionit, është zhdukur dhe nuk ka informacion të sigurt rreth tij, megjithëse ka shumë të ngjarë që ai të jetë arrestuar.
Në qershor, një tjetër anëtar i Komisionit, Admirali Miao Hua, u përjashtua zyrtarisht pasi u pezullua nga postet e tij vitin e kaluar. Nuk është e qartë se për çfarë akuzohet Miao: deklaratat zyrtare flasin për “shkelje të rënda të disiplinës”.
Si He, ashtu edhe Miao, kishin gëzuar karriera të shpejta në vitet e fundit falë mbështetjes së qartë të Xi, të cilit ata konsideroheshin të mbrojtur.
Fakti që njëri është zhdukur dhe tjetri është përjashtuar është i vështirë për t’u interpretuar, por tregon se si spastrimet brenda forcave të armatosura janë bërë të përhapura dhe të thella.
Sipas organizatës amerikane Jamestown Foundation, të paktën 45 oficerë janë hetuar, përjashtuar ose janë zhdukur që nga viti 2023.
Këto shkarkime janë pjesërisht për shkak të korrupsionit të vërtetë. Ushtria kineze ka qenë gjithmonë një institucion i mbushur me korrupsion, deri në pikën e vënies në pikëpyetje të aftësive të saj operacionale.
Direktiva e Xi Jinping është që ushtria kineze duhet të modernizohet plotësisht deri në vitin 2027. Sipas disa zyrtarëve amerikanë, kjo është data deri në të cilën ushtria do të jetë gati për të pushtuar Tajvanin, duke supozuar se planet e Xi-së janë realizuar.
Megjithatë, për t’u modernizuar, ushtria duhet të heqë qafe korrupsionin, i cili, sipas Xi-së, i devijon burimet dhe mjetet nga objektivat ushtarake.
Spastrimet kanë edhe një rol politik: që kur erdhi në pushtet, Xi ka larguar sistematikisht të gjithë rivalët e tij të brendshëm për të përqendruar kontrollin e shtetit dhe për të vendosur njerëz besnikë ndaj tij në pozicionet më të larta.
Ushtria është thelbësore në këtë kuptim, sepse forcat e armatosura kanë luajtur gjithmonë një rol politik në Kinë dhe janë përdorur për të forcuar ose dobësuar pushtetin e një udhëheqësi.
Në vitet e fundit, Xi ka arritur të bëhet udhëheqësi më i fuqishëm kinez që nga Mao Ce Duni, themeluesi i Kinës komuniste.
Intensiteti i spastrimeve të fundit ushtarake dhe fakti që zyrtarë të afërt me Xi-në u shënjestruan gjithashtu mund të interpretohen në dy mënyra: e para është se Xi po përshpejton më tej modernizimin e forcave të armatosura dhe po forcon kontrollin e tij mbi ushtrinë.
“Kur Xi Jinping sheh se edhe njerëzit e tij po bëjnë gabime, ka të ngjarë të zemërohet dyfish”, tha për “New York Times”, Joseph Torigian, një profesor në Universitetin Amerikan në Uashington.
Mundësia tjetër është që Xi Jinping nuk ka mjaftueshëm njerëz të cilëve mund t’u besojë për pozicione të rëndësishme, dhe se edhe ata që ai emëron, si He dhe Miao, nuk i kanë përmbushur pritjet e tij.
Nëse Xi vazhdon të shkarkojë zyrtarë – arsyetimi është – kjo do të thotë se ai vërtet nuk i beson hierarkisë ushtarake.
Kjo mund të jetë një problem si në rast lufte ashtu edhe në aspektin e stabilitetit politik, sepse mund të nënkuptojë që Xi nuk ka kontroll të plotë mbi ushtrinë.
Aktualisht, nuk ka prova konkrete që tregojnë se pushteti i Xi-së mbi ushtrinë është zvogëluar në ndonjë mënyrë.
Megjithatë, ka të ngjarë që ushtria të pësojë reforma të mëtejshme dhe ndryshime të mëdha në muajt ose vitet në vijim.
Muajin e kaluar, Komisioni Qendror Ushtarak lëshoi një deklaratë duke bërë thirrje për “eliminimin e plotë të ndikimeve toksike dhe rivendosjen e imazhit dhe autoritetit të oficerëve politikë të ushtrisë”.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
