Gazeta Si – Xhani Infantino, presidenti i FIFA-s, do të vizitojë Shqipërinë. Numri 1 i organit që drejton futbollin botëror e ka konfirmuar vetë këtë fakt, por ende nuk ka një datë për vizitën e tij në Tiranë.
Infantino i ka dërguar një letër presidentit të FSHF-së, Armand Duka, me anë të së cilës konfirmon vizitën. Ardhja e tij në Tiranë do të bëhet me rastin e inaugurimit të “Shtëpisë së Futbollit”, një investim i FIFA-s.
“Jam shumë i kënaqur që pata rastin t’ju takoj javën e kaluar në Vjenë, për Kongresin e 46-të të Zakonshëm të UEFA-s. Do të jetë një kënaqësi e madhe për mua të vizitoj vendin tuaj në muajt në vijim. Zyrat tona do të kontaktojnë për të gjetur datën dhe orën e duhur për vizitën”, – shkruan Infantino në letrën drejtuar Dukës.
Kreu i FIFA-s përmend në letër edhe finalen e Ligës së Konferencës. “Ju uroj sa më shumë suksese për organizimin e finales së ‘UEFA Conference League 2022’ në Tiranë”, – shkruan Infantino. Ai, me sa duket, nuk do të jetë në “Air Albania” më 25 maj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
