Nga Gazeta ‘Si’-Lëvizja Vetëvendosje ka njoftuar se kanë filluar procedurë disiplinore ndaj asamblistit të Vetëvendosjes në Prishtinë, Besnik Mujeci, i cili u kap me mbi 11 mijë doza ekstazi.
Kështu ka bërë të ditur zëdhënësi i kësaj partie, Arlind Manxhuka.
Ai ka thënë se kanë filluar procedurë disiplinore dhe komisioni disiplinor i VV-së do të mbajë mbledhje urgjente për të trajtuar rastin.
“Me të marrë informacionin kemi iniciuar menjëherë procedurën disiplinore me ç’rast Komisioni Disiplinor i LV-së do të mbajë mbledhje urgjente për të trajtuar rastin në fjalë. Pas mbledhjes do t’ju njoftojmë mbi vendimin.” – ka thënë ai.
Mujeci është në mesin e pesë personave të arrestuar nga Policia e Shqipërisë për përfshirje në kotrabandë të drogës.
Kreu i Drejtorisë së Policisë Tiranë, Tonin Vocaj, tha se janë sekuestruar 11 mijë e 300 tableta ekstazi me peshë 5 kg dhe me vlerë tregu rreth 400 mijë euro, që vinin nga Kosova nëpërmjet linjës së autobusëve të pasagjerëve Prishtinë-Tiranë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
