.png)
Nga Gazeta ‘Si’-Në reagimin e tij të parë pas trazirave në veri që erdhi në orët e mbrëmjes, presidenti i Serbisë, Aleksandër Vuçiç e “justifikoi” agresionin e sotëm me pakënaqësitë e serbëve që sipas tij vijnë nga mosformimi i Asociacionit.
Ndërsa i bëri thirrje komunitetit ndërkombëtar për formimin e Asociacionit të komunave me shumicë serbe, Vuçiç la të nënkuptohej se ishte palë me serbët e rebeluar dhe shtoi se në mungesë të krijimit të tij, ngjarje të tilla do të përsëriten.
Duke insistuar për Asociacionin ai deklaroi se policët në veri tashmë e tutje duhet të jenë serbë.
“E thërras bashkësinë kombëtare që të bëjë thirrje të themelohet bashkësia e komunave serbe. Kjo është mënyra e vetme që serbët të mos ndiqen në vatrat e tyre dhe mos të ketë më konflikte. I bëjmë thirrje popullit tonë për paqe dhe përmbajtje, t'i besojnë shtetit të tyre. Mos të ketë gjakderdhje më të madhe”- tha Vuçiç.
Ai deklaroi se Serbia nuk do ta njohë kurrë Kosovën si shtet duke përcaktuar kështu axhendën e dialogut të ardhshëm dhe për ngjarjen fajësoi kryeministrin e Kosovës, Albin Kurtin.
“Dyfytyrësia është emri i tyre i mesëm. Gjatë gjithë kësaj kohe kanë kërkuar të fajësojnë Serbinë për të njohur Kosovën. Kurrë nuk do ta njohim Kosovën e pavarur, mund të na vrisni të gjithëve, kurrë Serbia nuk do ta njohim Kosovën e pavarur. Një krijesë që e krijuat duke bombarduar Serbinë. Për të biseduar, do të bisedojmë. Por njohja e Kosovës të harrohet.”- tha Vuçiç.
Vrasjen e tre agresorëve serbë ai e barazoi me të gjithë Serbinë ndërsa deklaroi: Na vrisni të gjithëve!
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
