.png)
Nga Gazeta ‘Si’ – Kryeministri i Serbisë, Millosh Vuçeviç, ka replikuar deklaratat e kryeministrit të Kosovës, Albin Kurti, se Serbia po zhvillon trajnime ushtarake në bazat që i ka pranë kufirit me Kosovën.
Kurti, në një intervistë për rrjetin CNN, kërkoi nga Perëndimi që t’i bëjë presion Serbisë për t’i larguar ato baza.
LEXO EDHE:
‘Vuçiçi vepron njësoj si Putini’. Kurti në CNN: Serbia kërkon të zgjerohet duke i marrë tokë Kosovës
Në një postim në llogarinë e tij në Instagram, Vuçeviç tha se bazat e Ushtrisë së Serbisë janë të vendosura prej kohësh në “vijën administrative” – siç i referohet Serbia kufirit me Kosovën – dhe se me vendosjen e këtyre postblloqeve, Serbia nuk shkel asnjë marrëveshje ndërkombëtare.
“Fakti që Kurti, për të satën herë, tenton të krijojë një dramë mediatike, se gjoja e ashtuquajtura Kosovë është e kërcënuar, nuk është gjë tjetër veçse edhe një mjegull për sponsorët e tij perëndimorë”, tha Vuçeviç.
Ai shtoi se në Kosovë është i rrezikuar “vetëm populli serb”, të cilit “Kurti ia mohon të drejtat elementare të njeriut”.
“Të vetmit që kërcënohen në ‘Kosovë dhe Metohi’ janë serbët, dhe kjo për shkak të dhunës së vazhdueshme, provokimeve, veprimeve destruktive dhe thurjeve mediatike të bëra nga vetë Kurti”, tha Vuçeviç, pa përmendur ndonjë provë që do t’i mbështese këto pretendime.
Një ditë më herët, edhe kryetari i Kuvendit të Kosovës, Glauk Konjufca, tha se Serbia mund ta përsërisë “agresionin terrorist” në Kosovë, nëse nuk ndëshkohet për sulmin e vitit të kaluar në Banjskë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
