Një 39-vjeçar shqiptar është vrarë në Itali pas një konflikti për qiranë e apartamentit, nga një bashkëkombës tjetër.
Ngjarja ka ndodhur në Bari, ku sipas mediave italiane ka humbur jetën Santino Xhyra, i cili dyshohet se është qëlluar me tre plumba pistolete nga Shaban Fejzo.
Mësohet se viktima ka humbur jetën në spital pas plumbave të qitura në pjesën e kraharorit.
Hetimet e policisë italiane, të cilat u mbështetën në deklaratat e dëshmitarëve okularë dhe fqinjëve të viktimës, identifikuan shpejt autorin e dyshuar të vrasjes.
Autori i dyshuar ka pranuar fajin, duke rrëfyer se motivi ka qenë qiraja e apartamentit ku jetonte Santino Xhyra me një tjetër person.
Prej kohësh ata nuk paguanin qiranë dhe pronari i apartamentit, kishte kërkuar ndihmën e Fejzos, i cili kërkonte të transferohej për të jetuar në të njëjtën banesë.
Sipas ndërtimit të ngjarjes nga ana e policisë italiane, mes dy shqiptarëve ka pasur fillimisht dhunë fizike me grushte e shkelma, e më pas autori i krimit është larguar për t’u rikthyer me një pistoletë, me të cilën ka qëlluar tre herë nga një largësi mjaft të afërt viktimën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
