Gazeta Si – Një i ri shqiptar ka ndërruar jetë në një spital në Spanjë pak ditë pasi dyshohet se ishte qëlluar me thikë në bark.
Bëhet fjalë për Endrit Sinaj, 29 vjeç, i cili sipas mediave spanjolle u la nga një person i panjohur në dyert e urgjencës së një spitali në Girona.
I riu kishte precedentë kriminalë që lidheshin me trafikimin e marijuanës dhe vjedhjeve të dhunshme në Spanjë dhe Shqipëri.
Sipas asaj që shkruajnë mediat spanjolle, Sinaj kishte vetëm pak ditë që ishte liruar me kusht, pasi ishte arrestuar si pjesë e një operacioni kundër trafikut të drogës në Marbella.
Mësohet se Sinaj u dërgua në spital nga një tjetër shqiptar. Ai u identifikua pasi autoritetet panë kamerat e sigurisë.
Megjithatë ky person i tretë nuk ka dhënë shumë informacione, pasi ka shpjeguar se e ka gjetur Sinajn të plagosur anash rrugës dhe e ka çuar në urgjencë.
Pasi u mor në pyetje dhe pasi u ushtrua një kontroll në shtëpinë e shqiptarit të tretë në Tordera, hetuesit dolën në përfundimin se nuk kishte lidhje me vrasjen.
Sinaj kishte qenë i arrestuar në tetor të vitit 2020 në qytetin e Vlorës pasi akuzohej për tentativë grabitje.
Mediat shkruajnë se ai është transportuar me një automjet nga një person që e ka lënë atë në hyrje të urgjencës dhe më pas është larguar.
Dyshohet se autori i vrasjes së ndodhur në datë 23 prill është një tjetër person nga Shqipëria, identiteti i të cilit nuk dihet ende.
Në Shqipëri ai kishte qenë pjesë e një grup prej 5 personash të arrestuar në tetor të vitit 2020 në qytetin e Vlorës. Sinaj dhe pjesëtarët e tjerë të grupit kishin hyrë një një banesë të veshur me kapuç, të armatosur dhe duke u shtirur si policë.
Për këtë ngjarje, Endrit Sinaj dhe një nga shokët e tij u liruan dhe u lanë me masën e sigurisë detyrim paraqitje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
