.png)
Nga Gazeta Si- Autori i vrasjes së 52-vjeçares Kozeta Teço në Pogradec, është lënë në burg nga Gjykata e Korçës.
31-vjeçari, Ilirjan Selmani dyshohet se i mori jetën 52-vjeçares dhe më pas i dogji banesën në mënyrë që të fshinte provat.
Gjatë marrjes në pyetje në polici, Ilirjan Selmani pranoi disa episode, por jo që ta ketë kryer ai krimin.
Ai tha se 52-vjecarja e dhunonte kur pinte dhe deri më tani e kishte duruar sepse e donte.
Por, policia dhe prokuroria e Korçës ka grumbulluar prova të mjaftueshme, të cilat dokumentojnë të gjithë dinamikën nga momenti i kryerjes së krimit, deri në largimin e autorit nga banesa e 52 vjeçares.
Nga hetimet rezulton që autori i krimit, mbrëmjen e së dielës e kishte kaluar në shtëpinë e Teços, me të cilën kishte një lidhje prej 3 vitesh. Dyshohet se mes çiftit të ketë pasur një grindje të çastit, e cila ka degraduar në dhunë fizike të Selmanit ndaj 52-vjeçares dhe në fund përfundoi me vrasjen e partneres dhe djegien e banesës.
Pasi Gjykata e Korçës vendosi masën arrest me burg për autorin, avokati i tij, Denis Mekolli në një prononcim për mediat tha se Ilirjan Selmani asnjëherë nuk e ka pranuar se e ka kryer krimin.
“I mbrojturi nga unë në asnjë moment nuk e ka pranuar autorësinë e kryerjes së veprës penale, as në polici, as para gjykatës dhe as gjatë gjithë procedurës të pyetjeve të bërë ndaj tij”, tha avokati, duke shtuar se autori ka mbajtur një qëndrim, duke thënë se është një djalë shumë i mirë dhe kurrsesi nuk mund të kryej një krim kaq të rëndë.
Avokati thotë se autori nuk ka pranuar as se bashkëjetonte me viktimën.
Ai ka pranuar që ka pasur një njohje, por jo bashkëjetesë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
