Gjykata e shkallës se parë në Shkodër, ka dënuar me 10 vite burg Mark Kodrën, 47 vjeç, i cili me 29 maj 2021 qëlloi për vdekje bashkëfshatarin e tij Emiliano Ndou, 25 vjeç.
Gjykata vendosi 15 vite burg për të, por duke qenë se ai përfitoi nga gjykimi i shkurtuar, dënimi u ul në 10 vite burg. Ngjarja ka ndodhur në afërsi të një fushe sportive ‘kalçetoje’ të fshatit Bardhaj.
Fillimisht Ndou dhe Kodra janë përfshirë në një debat verbal dhe në këtë moment 47-vjeçari ka nxjerrë armën e zjarrit kallashnikov dhe ka qëlluar për vdekje të riun.
Edhe pse fqinj me njëri-tjetrin, marrëdhëniet mes tyre kishin shumë kohë që shoqëroheshin vazhdimisht nga probleme.
Në dëshminë e tij, ai është shprehur se e qëlloi për vdekje 25-vjeçarin për xhirimin e gomave të motorit pranë shtëpisë së tij. Një veprim i tillë, Emiljan Ndou e bënte vazhdimisht dhe Kodra ka thënë se e kishte paralajmëruar disa herë.
Mbrëmjen kur ndodhi ngjarja ka qenë djali i autorit ai që u konfliktua fillimisht me viktimën, ndërsa kur ky i fundit shkoi te banesa e 47-vjeçarit, Mark Kodra e qëlloi me kallashnikov duke e lënë të vdekur.
Gruaja e autorit, Bukuroshe Kodra apeloi për ndihmë nga shteti për shkak të frikës nga gjakmarrja.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
