Vrasjet që kanë tronditur Elbasanin në javët e fundit, kanë sjellë lëvizjen e shefit të hetimit, Gjon Gecaj, i cili është transferuar në sallën operative të Drejtorisë së Policisë Lezhë.
Në vendin e tij, është emëruar Krenar Guçe, i cili ka qenë më parë shef i sektorit anti-drogë në Drejtorinë e Policisë Tiranë dhe se fundmi oficer në sektorin e krimeve të rënda.
Brenda 3 javësh, në Elbasan kanë ndodhur tre ngjarje të rënda, ku kanë humbur jetën tre persona. Në datë 21 prill, në kulmin e fushatës elektorale, 4 ditë përpara zgjedhjeve parlamentare u ekzekutua Pjerin Xhuvani.
Autor i dyshuar i krimit është Arbër Paplekaj, ish-efektiv i RENEA-s, pjesë e skuadrës së PD-së për mbrojtjen e votës.
Në 6 maj, Koço Buzo ekzekuton bashkëshorten e tij Liljana Buzo 54-vjeçe. Ngjarja ndodhi pasi çifti kishte dalë nga gjykata, pasi ishin në proces divorci.
Ndërsa në 11 maj, u vra në atentat mafioz, Everest Çaka në sy të bashkëshortes së tij, e cila mbeti e plagosur në dorë. Dyshohet se viktima ka qenë i përfshirë në një kalvar të gjatë hamrrjesh që kanë lidhje me trafikun e drogës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.