.png)
Gazeta Si – Autorët e vrasjes së 38-vjeçarit Fatjon Dervishi, duket se kanë zbatuar një plan të mirë detajuar për të eliminuar shënjestrën e tyre.
Vrasja ndodhi në zonën e Sukthit në Durrës, pranë shinave të trenit në fshati Katund. Viktima ndodhej në një lokal me një shokun e tij, i cili i ka shpëtuar për mrekulli atentatit në mjetin që udhëtonin në dy.
Në njoftimin e policisë, thuhet se viktima rezulton me precedentë penalë në fushën e trafikimit të lëndëve narkotike në Holandë.
Dyshohet se autorët e kanë ndjekur nga lokali ku po qëndronte, deri tek shinat, ku mjeti uli shpejtësinë për shkak të rrugës së dëmtuar dhe më pas hapën zjarr drejt 38-vjeçarit duke e plagosur rëndë dhe që më pas humbi jetën në spital.
Autorët kanë pritur këtë moment që të qëllonin dhe për të qenë të sigurt se Dervishi nuk do të mund të bënte manovra me mjetin e tij.
Sipas burimeve paraprake, Fatjon Dervishi është emër i njohur për policinë, sepse ka qenë i skeduar për drogë dhe krime ndaj personit dhe pronës, por asnjë prej këtyre nuk i është provuar. Ndërkohë vëllai i viktimës, Fatbardh Dervishi ndodhet në burg.
Mësohet se veç mbiemrit Dervishi, vëllezërit mbanin edhe mbiemrin Doda. Vëllai i viktimës ka qenë i përfshirë në një grup kriminal në Spanjë, ku është dënuar për pastrim parash. Sipas informacioneve, ai dyshohet gjithashtu për zhdukjen e një personi në Spanjë.
Në vitin 2018 Fatbardh Dervishi dyshohet se ka zhdukur personin e identifikuar si Tauland Malshi. Po ashtu, në janar 2022, Fatbardh Dervishi plagosi të dashurën e tij 23-vjeçare nga Durrësi në një dhomë hoteli, teksa po festonin së bashku vitin e ri.
Pas plagosjes në hotel, 32-vjeçari u largua nga vendi i ngjarjes. Në atë kohë e plagosura e shfajësoi Dervishin duke deklaruar se ishte një ngjarje pa dashje, po në Gjykatën e Durrësit vijon gjykimi ndaj tij për plagosje të lehtë.
Aktualisht ai ndodhet në burg për për akuzën e vjedhjes së automjeteve, falsifikim dokumentesh, armëmbajtje pa leje, trafik droge, grup kriminal. Sipas informacioneve, deri më tani larja e hesapeve është pista ku po heton policia.
Banorët e zonës që e njihnin viktimën, thanë për mediat se Dervishi ishte kthyer nga jashtë shtetit, ku jeton me familjen, për të ndërtuar një restorant në shtëpinë e tij.
Gjashtë persona janë shoqëruar nga policia e Durrësit në funksion të zbardhjes së vrasjes që ndodhi në Katund Sukth.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
