Vrasja e Martin Çeços do të gjykohet nga e para, Apeli rrëzon vendimin për 83 vite burg për të pandehurit

Nga Gazeta ‘Si’- Gjykata e Apelit ka vendosur të rrëzojë vendimin e dhënë nga Gjykata e Korçës, që parashikonte një total prej 83 vitesh burg për të pandehurit në çështjen e vrasjes së Martin Çeços, duke ndjekur kërkesën e Prokurorisë.

Me vendimin e sotëm, trupa gjykuese e Apelit me relatore Marsela Pepi dhe anëtarë Genti Dokollari e Irena Brahimi ka vendosur prishjen e këtij vendimi dhe kthimin e çështjes për rigjykim në të njëjtën gjykatë, por me një trupë tjetër gjyqësore.

Më herët, Gjykata e Korçës dënoi katër autorët me 83 vite burgim në total, nga të cilat 20 vite do i vuante Martina Pajollari.

E reja ishte në një lidhje me viktimën, por nga hetimet e prokurorisë rezultoi se ajo kishte nxjerrë në pritë 26-vjeçarin.

Dyshohet po ashtu se gjatë kohës që ka qenë në një raport dashurie me të riun, ka patur lidhje me një nga kushërinjtë Mollaj, që u dënuan për krimin e rëndë të tre viteve më parë.

Rasti që tronditi Maliqin

Martin Çeço u vra më 12 qershor 2022. I riu u gjet i mbytur me litar dhe i hedhur në rezervuar pas dy ditësh që kishte humbur kontaktet me familjen.

Policia dhe Prokuroria e Korçës arrestuan si të dyshuar të ngjarjes kushërinjtë Valter dhe Edlir Mollajn nga fshati Marjan i Korçës dhe bariun e tyre Bledi Angjo. Sipas hetuesve motiv i ngjarjes ishte fakti se viktima ishte në një lidhje me Martina Pajollarin, me të cilën u tha që ishte paralelisht në një lidhje edhe me njërin prej kushërinjve.

Më pas prokuroria vuri në bankën e të akuzuarit dhe Martina Pajollarin si bashkëpunëtore në këtë ngjarje, pasi u dyshua se kishte nxjerrë në pritë viktimën.

Sipas palës mbrojtëse në gjykim, në asnjë moment nuk u vërtetuar direkt apo indirekt lidhja e të pandehurve me viktimën.

Mbrojtja në seancë e kryer nga avokatë të ndryshëm, artikuloi se nuk është kërkuar nga prokuroria vënia në dispozicion e materialeve nga kompania “Meta” ku është pretenduar se viktima dhe autorët e dyshuar kanë pasur kontakt.

Ndërkaq sipas tyre në gjykatë asnjë provë nuk vërteton që Valter dhe Edlir Mollaj të kenë kryer ketë krim dhe paralajmëruan apelim të vendimit.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.