.png)
Gazeta Si – Zyra e Prokurorit të Qarkut të Utah në SHBA, do të kërkojë dënimin me vdekje për Tyler Robinson, 22-vjeçarin e akuzuar për vrasjen e ndikuesit të ekstremit të djathtë, Charlie Kirk.
Njoftimi u bë nga prokurori Jeff Gray. Mes akuzave të shumta që do të ngrihen kundër Robinson, i cili do të mbetet në paraburgim pa lirim me kusht, është edhe vrasja e rëndë, e cila mbart dënimin me vdekje.
22-vjeçari u paraqit para një gjyqtari për një seancë dëgjimore në distancë, e para që nga arrestimi i tij. Ditën e të shtënave, Tyler Robinson i dërgoi një mesazh partneres së tij duke njoftuar vrasjen.
Tyler Robinson u paraqit në gjykatë për herë të parë në Provo, Utah, nëpërmjet lidhjes video nga burgu. 22-vjeçari dukej i qetë, konfirmoi identitetin e tij dhe dëgjoi pa u lëkundur akuzat dhe qëllimin e prokurorit për të kërkuar dënimin me vdekje.
Ai ende nuk ka avokat dhe gjykatësi i tha se mund të ketë një. Gjykatësi njoftoi se seanca e radhës do të jetë më 29 shtator.
Robinson pohoi me kokë kur gjykatësi e informoi se do të mbetej në burg pa lirim me kusht për gjithë kohëzgjatjen e çështjes.
“Vrasja e Charlie Kirk është një tragjedi për vendin: ai u vra ndërsa ushtronte një nga të drejtat tona më të shenjta, të drejtën e lirisë së shprehjes”, deklaroi prokurori.
Akuzat përfshijnë gjithashtu përdorim të paligjshëm të një arme zjarri, manipulim të dëshmitarëve dhe pengim të drejtësisë.
Plumbi që goditi Kirk në qafë, duke e vrarë atë, kaloi pranë njerëzve të tjerë, përfshirë fëmijët e pranishëm dhe personin që e kishte pyetur aktivistin Kirk për të shtënat para se të vritej.
Prokurori i Utah-ut, Jeff Gray, shpjegoi se kjo rrethanë është një faktor rëndues për të akuzuarin, sepse ai rrezikoi sigurinë e të tjerëve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
