.png)
Nga Gazeta ‘SI’ – Një 34-vjeçar, i identifikuar si Kristian Kola, u ekzekutua me armë zjarri mbrëmjen e kësaj të enjteje në lagjen “Vasil Shanto” nga dy persona ende të paidentifikuar.
Mësohet se ngjarja ka ndodhur tek kinema Republika në qendër të qytetit. Sipas raportimeve autorët janë dy persona, të cilët u larguan me një motor të zi dhe me skafandër në kokë.
Përgjatë natës policia ka ngritur postoblloqe dhe ka ushtruar kontrolle nëpër akset e qytetit me qëllim kapjen e autorëve, por deri më tani nuk ka asnjë gjurmë prej tyre.
Pasi ekzekutuan të riun, i cili ishte ulur në një lokal, të dy autorët kanë humbur gjurmët në një rrugicë të lagjes.
Policia po heton disa pista, mes të cilave, konfliktet e mëparshme të 34 vjeçarit të ndjerë. Informacionet nga verifikimet paraprake bëjnë me dije se viktima nuk ishte person problematik dhe se punonte në ndërtim së bashku me babain.
“Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve”, njoftoi policia.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
