Gazeta Si – Vllaznia ka mbyllur zyrtarisht bashkëpunimin me trajnerin maqedonas, Goce Sedloski. Ashtu siç pritej, klubi shkodran ka njoftuar në faqen e tij largimin e trajnerit që zuri vendin e Mirel Josës në muajt e fundit.
Në njoftimin e klubit shkruhet se Sedloskit i ka përfunduar kontrata, por më shumë mundësi drejtuesit e Vllaznisë nuk janë bindur nga puna e këtij trajneri. Me shumë vështirësi skuadra shkodrane siguroi vendin e katërt, që e çon në kupat e Europës.
Tani klubi është vënë në kërkim të trajnerit të ri dhe mes emrave të kandidatëve janë Tomas Bërdariç dhe Ardian Nuhiu. Bërdariç e njeh mirë ambientin, sepse e ka drejtuar Vllazninë pak kohë më parë, madje duke propozuar një futboll simpatik, ashtu siç në Shkodër e duan.
Kandidati tjetër i deritanishëm, Ardian Nuhiu, shihet si një alternativë e mirë. Ai ka drejtuar Shkupin në Maqedoninë e Veriut dhe Dritën në Kosovë, të cilën e ka shpallur kampione. Mund të ketë edhe ndonjë emër surprizë, duhet pritur vendimi i drejtuesve për ‘timonierin’ e ri të Vllaznisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
