Një 71-vjeçar në Selanik është shtruar në spitalin “Papanikolou” pas një infeksioni të rëndë respirator të shkaktuar nga virusi metapneumovirus njerëzor (HMPV), i cili lidhet me një shpërthim të dokumentuar në Kinë. Pacienti, i cili ka sëmundje shoqëruese, dyshohet se është infektuar nga vajza e tij, e cila kishte udhëtuar në Kinë dhe kishte shfaqur simptoma të virusit pas kthimit.
Pas analizave për viruset kryesore respiratore si gripi, koronavirusi dhe RSV, që rezultuan negative, mjekët e spitalit kryen testime specifike që konfirmuan praninë e HMPV. Ky virus, megjithëse i njohur prej kohësh nga komuniteti shkencor, është më pak i njohur për publikun dhe shpesh shfaqet gjatë dimrit, duke prekur kryesisht fëmijët.
Ekspertët grekë po përpiqen të qetësojnë shqetësimin publik, duke theksuar se virusi nuk është i ri dhe se shpërthime të tilla ndodhin çdo vit. Megjithatë, rritja e rasteve këtë dimër, e kombinuar me pamjet e mbingarkesës në spitalet kineze dhe konfuzionin e informacionit, ka ngritur shqetësime.
Autoritetet shëndetësore po monitorojnë situatën dhe këshillojnë qytetarët të ndjekin masat e zakonshme për parandalimin e infeksioneve respiratore, ndërsa nënvizojnë se HMPV nuk monitorohet rregullisht për statistika, duke e bërë të vështirë vlerësimin e përhapjes së tij.
Metapneumovirusi njerëzor (HMPV) është një virus sezonal i njohur që shkakton infeksione të rrugëve të frymëmarrjes, veçanërisht gjatë dimrit dhe pranverës. Kohët e fundit, në Kinë është vërejtur një rritje e rasteve të infeksioneve të shkaktuara, duke çuar në mbipopullimin e spitaleve dhe shqetësime për një shpërthim të ri viral.
Në Shqipëri ende nuk është zbuluar asnjë rast në mënyrë zyrtare ndërkohë që mjeku epidemiolog Ilir Alimehmeti ka thënë se ky virus qarkullon intensivisht në vendin tonë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
